کابل، د مرغومي ۳مه، باختر
د بغلان سیمه ییزو چارواکو په نشه يی توکو د لسګونه روږدو کسانو د درملنې او خپلو کورنیو ته یې د سپارلو خبر ورکړی دی.
د بغلان د امنیې قومندانۍ له نشه يي توکو سره د مبارزې مدیر ملا محمد نبي باختر آژانس ته وویل چې ۴۱ روږدي کسان تر ۴۵ ورځنۍ درملنې وروسته خپلو کورنیو ته وسپارل شول.
د نوموړي په خبره یاد کسان د بغلان له مختلفو سیمو څخه راټول شوي وو او تر بشپړې درملنې وروسته خپل عادي ژوند ته را وګرځېدل.
د یادونې وړ ده، چې په بغلان کې له تېرو دوو کلونو راهیسې د شاوخوا ۳ زره ۴۰۰ روږدو کسانو درملنه شوې او دمګړۍ هم لسګونه روږدي کسان تر درملنې لاندې دي.
