کابل – باختر د غبرګولي دمياشتې ١٦
د افغانستان د اسلامي جمهوریت اجرائیه رئیس ډاکټر عبدالله عبدالله نن په سپېدار ماڼۍ کي د کابل لپاره د ایټالیا له نوي سفیر روبرټو کنټوني سره وکتل.
داجراييه رياست مطبوعاتي دفترباحترآژانس ته خبرورکړ
په دې کتنه کي د دواړو هیوادونو ترمنځ د هر اړخیزو همکاریو ترڅنګ د پرمختیايي او اقتصادي برخو پر څو مشخصو پروژو هم بحث وشو.
اجرائیه رئیس د ایټالیا سفیر ته د نوي دندې د مبارکۍ ترڅنګ وویل، چي هیواد یې د ایټالیا په ملاتړ د ریل ګاډي د پټلۍ او د هرات د هوايي ډګر د رغوني کارونو ته هیله من دی.
ده زیاته کړه، چي د هرات د هوايي ډګر د رغوني چارې به د اوسني پلان مطابق سرته رسيږي او د کار په مخ کې یې هیڅ راز خنډ وجود نلري.
هغه د هیواد په لوېدیځ کي د ریل ګاډي د پټلۍ جوړولو پروژې ته په اشارې سره وویل، چي ددغې پروژې تکمیلي به افغانستان د ریل پر لیکه د ایران د چاه بهار بندر ته ونښلوي.
په کابل کي د ایټالیا نوي سفیر روبرټو کنټوني وویل، چي هیواد یې د اوږدمهال لپاره له افغانستان سره خپلو همکاریو ته ژمن دی او اړیکي به نورو برخو او پړاوونو ته هم وغځوي.
نوموړي زیاته کړه، چي هیواد یې د هرات د هوايي ډګر رغولو پروژې ته لېوال دی او پلان لري، چي تر راتلونکو میاشتو پوري یې د کار پیلوني د امکاناتو سنجوني پروسه پیل کړي.
هغه یادونه وکړه، چي دوی د ریل پټلۍ جوړوني پر پروژه هم کار کوي او هیله لري، چي ددې پروژې د کارونو په برخه کي هم هڅي چټکي سي.
ښاغلي کنټوني د وارسا او بروکسل په کنفرانسونو کي هم د افغانستان له ونډي ملاتړ او ورته له چمتووالي څخه ستاینه وکړه.
