چین په ملګرو ملتونو کې د فلسطین د دایمي غړیتوب ملاتړ کوي

نړۍ، د وري ۳۰ مه، بهرنۍ رسنۍ

د چین ډیجیټل خبري آژآنس د راپور له مخې د دغه هېواد د بهرنیو چارو وزیر وانګ یي په جاکارتا کې له خپل اندونزیایي سیال سره یو ګډ خبري کنفرانس ته ویلي، چې هېواد یې په ملګرو ملتونو سازمان کې د فلسطین د دایمي غړیتوب ترلاسه کولو بشپړ ملاتړ کوي.

نوموړي په غزه کې روان جنګ ته په اشارې ویلي، چې ژر تر ژره باید اوربند ټینګ شي او روان انساني کړکېچ ته د پای ټکی کښېږدي.

ټاکل شوې سبا د جمعې په ورځ په ملګرو ملتونو کې د فلسطین د دایمي غړیتوب ترلاسه کولو پر سر دغه سازمان کې رایه اچونه وشي.

انګېرنه دا کیږي، چې ممکن د امریکا متحده ایالات چې د اسرایلو نږدې ملګری دی، له دغې موضوع سره سخت مخالفت وکړي.