کابل، د غوايي ۱۷مه، باختر
د ریاست الوزراء سیاسي مرستیال مولوي عبدالکبير پرون د افغانستان لپاره د روسیې فدراسیون له سفیر دیمیتري ژیرنوف سره په سپېدار ماڼۍ کې وکتل.
د روسیې سفیر په دغه کتنه کې وویل چې روسیه په بېلابېلو برخو کې له افغانستان سره همکارۍ ته چمتو ده او غواړي د دواړو لورو تر منځ اړیکې لا وغوړېږي.
نوموړي زیاته کړه، چې د اسلامي امارت او روسیې د دوه اړخیزو همکاریو او تعامل پراختیا کولای شي د سیمې ثبات او د افغانستان اقتصادي پیاوړتیا سره مرسته وکړي.
دیمیتري ژیرنوف د افغانستان په اړه په نړیوالو غونډو کې د روسیې د مثبت نظر په یادولو سره وويل چې مسکو په مهمو جلسو کې د اسلامي امارت نظر ته ارزښت ورکوي.
هغه همدارنګه د ریاست الوزراء سیاسي مرستیال ته د تاتارستان په کازان کې په جوړېدونکې نړیواله ناسته کې د ګډون د بلنې ترڅنګ د دې ناستې په اړه مالومات ورکړل.
په ورته وخت کې د ریاست الوزراء سیاسي مرستیال مولوي عبدالکبير په دغه کتنه کې په بېلابېلو برخو کې له افغانستان سره د روسیې د همکارۍ او مرستو قدرداني وکړه او ويې ویل چې له مسکو سره د کابل اړیکې د دواړو خواوو په ګټه دي او کولای شي په سیمه کې د ثبات او پرمختګ سبب شي.
هغه همدارنګه د روسیې حکومت له رسمي بلنې څخه په مننې د دواړو هېوادونو ترمنځ اړیکي مهمې او دوستانه وبللې او له روسي پانګوالو یې وغوښتل چې په افغانستان کې پانګونه وکړي.
