کابل، د غوایي لومړۍ نېټه، باختر
د هلمند ځايي مسوولین وايي چې د وروستیو سېلابونو د راوتو له امله د دغه ولایت په ګرشک او کجکي ولسوالیو کې ۱۳ تنو ته مرګژوبله اوښتې ده.
د هلمند د اطلاعاتو او کلتور رییس حافظ عبدالباري راشد د باخترآژانس خبریال ته وویل، چې د یاد ولایت د کجکي ولسوالۍ په (ابغول) سیمه کې د اورښتونو او سېلابونو له امله د ښځو او ماشومانو په ګډون د یوې کورنۍ ۷ غړي شهیدان او د یادې ولسوالۍ په قاضي خېلو سیمه کې د دېوال د چپه کېدو له امله ۳ تنه ټپیان شوي دي.
هغه زیاته کړه چې د ګرشک ولسوالۍ په تاجکانو کلي کې ورته پېښه کې د چت پرېوتو له امله د یوې کورنۍ ۲ غړي مړه او یو بل ټپي شوی دی.
ورته وخت کې د بامیانو د والي ویاند عبدالصبور فرزان سیغاني وايي، چې د یاد ولایت په خشکک سیمه کې د سېلابونو د راوتو له امله د یوې کورنۍ ۳ غړي شهیدان شوي دي.
