کابل، د غوایي ۱۰مه، باختر
په لوګر کې د سیمه ییزو ټولګیو څه باندې ۶ زره زده کوونکو سره د درسي موادو مرسته شوې ده.
د یاد ولایت د پوهنې ریاست ویاند شاه پور عرب د باختر آژانس سیمه ییز خبریال ته ویلي چې د یونیسف موسسې په همغږۍ د وایفا همکارې موسسې په مالي ملاتړ ۶۴۸۷ زده کوونکو سره د درسي کتابونو او درسي توکو مرسته شوې ده.
عرب زیاته کړه، چې په وېشل شويو توکو کې کتابونه او قرطاسیه شامله ده او د یادو مرستو سربېره د نوموړو ټولګیو له شته ۲۳۸ نارینه او ښځینه ښوونکو سره هم د اړتیا وړ درسي توکو مرسته وشوه.
د یادونې وړ ده، چې د یادې مرستې سربېره زده کوونکو ته د لاسونو مینځلو صابونونه او سیمه ییزو ټولګیو ته د اوبو ترموزونه، سپینې تختې او مارکرونه هم وېشل شوي دي.
