کابل، د غوايي ۱۹مه، باختر
د کندهار ولایت په ښوراندام په سیمه کې د احمد نبي زاده په نوم پر سل جریبه ځمکه د ۱۰۰ میلیونه ډالرو په لګښت په دوو فازونو کې د سمینټو د یوې لويې کارخونې د جوړېدو کارونه په چټکۍ سره روان دي.
د یادې کارخونې د چارو تنظیمونکي مبین احمد ولي زاده له باختر آژانس سره د خبرو پرمهال وویل، چې د سمینټو د دې لويې کارخونې د جوړېدو چارې ۵۵ سلنه بشپړې شوي، چې د لومړي فاز تر بشپړېدو وروسته به ورځني تولیدات ۱۵۰۰ او د دوهم فاز تر بشپړېدو وروسته به یې ورځني تولیدات ۵ زره ټنه وي.
نوموړي زیاته کړه، چې د دغې کارخونې په جوړېدو سره به شاوخوا ۶ زره کسانو ته په مستقیم او غیري مستقیم ډول د کار زمینه هم برابره شي.
د افغانستان اسلامي امارت د صنعت او سوداګرۍ وزارت د صنعتي پارکونو د پراختیايي چارو رئیس مفتي علي محمد چې د دې کارخونې د جوړېدو له روانو چارو د لیدنې پرمهال وویل، چې تر راتلونکي یوه کال پورې به د يادې کارخونې چارې بشپړې او ګټې اخیستنې ته وسپارل شي.
هغه زياته کړه، چې د يادې کارخونې په جوړېدو سره به د سمینټو له اړخه افغانستان تر ډېره کچه پر ځان بسيا شي.
