کابل، د کب ۱۴مه، باختر
د کانونو او پټرولیم وزارت سرپرست شیخ الحدیث شهاب الدین دلاور، د چین له یو شمېر پانګه والو سره وکتل.
د کانونو او پټرولیم وزارت په خپره شوې خبرپاڼه کې راغلي چې په دې کتنه کې، یادو پانګه والو د افغانستان اسلامي امارت له لوري د پانګونې لپاره د مناسب چاپېریال پر برابرولو خوښي څرګنده کړې او د هېواد په کانونو په ځانګړې توګه د مرمر ډبرو په کانونو کې یې د پانګونې غوښتنه کړې ده.
د کانونو او پټرولیم وزارت سرپرست هم، په افغانستان کې د پانګونې د شته فرصتونو په اړه د خبرو ترڅنګ؛ په هېواد کې د پانګونې په برخه کې د هغوی د لېوالتیا هرکلی کړی او د کانونو د قانون او طرزالعمل مطابق یې ورسره د همکاريو ژمنه کړې ده.
تر دې وړاندې هم یو شمېر کوچنیو او لویو چینايي شرکتونو، په افغانستان کې د کانونو په برخه کې د پانګونې لېوالتیا ښودلې وه.
