کابل، د وري ۷مه، باختر
د اطلاعاتو او کلتور وزارت د مالي، اداري او ګرځندوی معین مولوي سعدالدین سعید، په کابل ښار کې له مدينې مارکېټ، پُل باغ عمومي راډيو سټېشن او د افغان اعلاناتو پخواني تعمیر ته څېرمه ځايونو څخه چې د دغه وزارت ملکیتونه دي؛ لیدنه کړې ده.
باختر آژانس ته په رارسېدلي خبر کې ویل شوي چې د دې لیدنې پر مهال، د اطلاعاتو او کلتور وزارت د مالي، اداري او ګرځندوی معین او د وزارت د ملکیتونو کمیټې مشر مولوي سعدالدین سعید او اړوندو مسئولینو، د املاکو د ستونزو د حل او په یادو برخو کې د اقتصادي فعالیتونو د زیاتوالي په اړه خبرې کړې دي.
ویل شوي چې د وزارت د ملکیتونو کمېټه په پام کې لري په دغه شان اقداماتو او د خپلو ملکیتونو په تثبیت سره؛ د ملي عوایدو کچه لوړه کړي، ملي اقتصاد ته وده ورکړي؛ خصوصي سکتور پانګونې ته وهڅوي او د هېوادوالو لپاره کاري فرصتونه رامنځته کړي.
