کابل / د غويي ۲۶مه / باختر
د اطلاعاتو او فرهنګ وزارت سرپرست محمد طاهر زهير نن د دغه وزارت له رييسانو او کارکوونکو سره په غونډه کې، د کوچني اختر په مناسبت هغوى ته مبارکي وويله.
د باختر آژانس خبریال د خبر له مخې؛ په دې غونډه کې د اطلاعاتو او فرهنګ وزارت سرپرست د تېر اختر په مناسبت د دغه وزارت رييسانو او کارکوونکو ته مبارکي وويله او د الله (ج) له درباره يې د افغانستان د خلکو په تېره بيا د دغه وزارت د کارکوونکو د عبادتونو د قبلېدو هیله وکړه.
د اطلاعاتو او فرهنګ وزارت سرپرست څرګنده کړه چې په افغانستان کې د بېځايه لګښتونو په ګډون ځیني ناوړه دودونه او رواجونه او يولړ نور موارد چې له افغاني فرهنګ سره جوړ نه دي؛ رواج شوي دي.
هغه وويل: پخوا زموږ نېکونه راټولېدل او اختر يې د مينې، صميميت، سولې، روغې جوړې، یووالي او پيوستون په خبرو او د هېواد د خلکو د وياړونو په بيانولو سره نمانځه.
هغه زياته کړه چې اوس هم د افغانستان د وياړونو، معنويت، فکر او فرهنګ د جوتولو لپاره فرصت شته.
محمد طاهر زهير د ناوړو دودونو د اصلاح او د فرهنګي ودې په برخه کې د اطلاعاتو او فرهنګ وزارت رول مهم وباله او څرګنده يې کړه چې په افغانستان کې هر فرصت کېداى شي د فرهنګ جوړولو لپاره يو فرصت وي.
هغه ټينګار وکړ: په اطلاعاتو او فرهنګ وزارت کې ټولې هلې ځلې بايد د دې لپاره وي چې په خپل کار، خبرو او چلند کې نورو ته فرهنګي بېلګه واوسو او تر هغو چې په افغانستان کې فرهنګ اصلاح نه شي او فرهنګي اصلاحات او بدلون رامنځ ته نه شي؛ هېڅ بدلون به ښه پایله ونه لري.
همدارنګه په دې غونډه کې د اطلاعاتو او فرهنګ وزارت د خپرونو چارو معين عبدالمنان شېواى شرق، د فرهنګ او هنر معين هارون حکيمي او د ګرځندوى، مالي او اداري معين عبدالبشير حکيمي په وار سره خبرې وکړې. هغوى هم د اطلاعاتو او فرهنګ وزارت کارکوونکو ته د کوچني اختر مبارکي وويله او د خپلو اړوندو چارو د لاښه والي په خاطر يې د خپلو هلوځلو ډاډ ورکړ.
دغه راز د اطلاعاتو او فرهنګ وزارت د خپرونو چارو معين ټينګار وکړ چې د کرونا ويروس د خپرېدو د مخنيوي کمېسيون د پرېکړې له مخې؛ په دولتي ادارو کې د ماسک کارول او د روغتيايي لارښونو رعايتول جبري دي.
هغه هيله څرګنده کړه چې د هېواد خلک په تېره بيا دولتي کارکوونکي د روغتيايي لارښوونو په رعايتولو او د ماسک په کارولو سره، وکولاى شي د کرونا درېمې څپې ته هم ماتې ورکړي.
پاى \ج \ ذ
