کابل، د سلواغې ۴مه، باختر
د پکتیکا ولایت د ګومل فرعي سیندیزې حوزې ریاست له لوري د یوسف خېل ولسوالۍ اړوند د خیربین په سیمه کې د اوبو د یوه کوچني بند د رغولو چارې پیل شوې.
د ګومل فرعي سندیزې حوزې رئیس قاري فتح محمد ذاکر وویل، د یوسف خیل ولسوالۍ اړوند د خیربین په سیمه کې د ۵ میلیونو افغانیو په لګښت د اوبو یو کوچنی بند د جوړولو چارې پیل شوې دي.
قاري ذاکر وویل، اړوند قراردادي شرکت به د ټاکل شوي هوکړه لیک او ټولو اصول مطابق خپل کارونه مخکې وړي او چارې به یې د ټاکلي وخت سره سم بشپړیږي.
د یادونې ده، چې د ګومل فرعي سندیزي حوزې ریاست تر چتر لاندې په پکتیکا کې د ۷۵ میلیونه افغانیو په لګښت د اوبو ذخیره کولو کوچني بندونه جوړېږي، چې د ځینو د جوړولو چارې عملآ روانې دي.
