کابل (بی این اے) امارت اسلامیہ افغانستان کے نائب وزیر اعظم برائے اقتصادی امور ملا عبدالغنی برادر اخوند کی موجودگی میں وزارت خزانہ اور وزارت پانی و توانائی، افغانستان الیکٹرسٹی کمپنی اور نجی شعبے کے درمیان بجلی کی پیداوار اور تعمیراتی منصوبوں سے متعلق تقریبا چار ارب افغانی مالیت کے چار معاہدے طے پائے۔
باختر ایجنسی کے نامہ نگار کے مطابق اس موقع پر سرکاری انفارمیشن اینڈ میڈیا سینٹر میں منعقدہ ایک تقریب میں وزیر پانی و توانائی ملا عبداللطیف منصور نے کہا کہ اسلامی تعلیمات کی بنیاد پر امارت اسلامیہ کے قائدین اور عہدیداران ملک کی سلامتی اور معیشت کی بہتری کے ذمہ دار ہیں۔ وہ ملک کی خود ارادیت، ترقی اور آباد کاری کے ساتھ ساتھ اہل وطن کی بھلائی پر توجہ دے رہے ہیں۔
عبداللطیف منصور نے مزید کہا کہ امارت اسلامیہ کی بحالی اور مجموعی سیکیورٹی کی فراہمی کے بعد قومی اور بین الاقوامی سرمایہ کاروں اور تاجروں کی بڑی تعداد افغانستان آنے اور مختلف شعبوں میں سرمایہ کاری کرنے پر راغب ہوئی ہے۔
عبداللطیف منصور کے مطابق ایک قومی تعمیراتی کمپنی نے وزارت پانی و توانائی کے ساتھ ہلمند کے مرکز لشکر گاہ شہر میں 367 ملین افغانی مالیت کی پانچ منزلہ جدید ترین مارکیٹ بنانے کا معاہدہ کیا ہے۔ یہ مارکیٹ وزارت پانی و بجلی کی ملکیت ہوگا لیکن 17 سال تک اس کی آمدنی تعمیر کرنے والے تاجر کے پاس جائے گی۔ ان 17 سالوں میں کمپنی آمدنی کا 30 فیصد حصہ جو تقریباً 17 بلین ہے واپس حکومت کو دے گی جو امارت اسلامیہ کے خزانے میں جمع ہوگا۔
تقریب کے دوران ٹھیکیدار کمپنیوں کے نمائندوں نے سرمایہ کاری اور خدمات کے لیے سیکیورٹی اور سہولیات فراہم کرنے پر امارت اسلامیہ افغانستان کا شکریہ ادا کیا۔ انہوں نے وعدہ کیا کہ وہ امارت اسلامیہ کے شانہ بشانہ ملک کی خوشحالی کے لیے پوری ایمانداری اور عزم کے ساتھ اپنی سرگرمیاں جاری رکھیں گے۔
انہوں نے دیگر سرمایہ کاروں اور تاجروں سے مطالبہ کیا کہ اب ملکی سطح پر سلامتی کو یقینی بنایا گیا ہے اور سرمایہ کاری کے مواقع پہلے سے بہتر فراہم کیے گئے ہیں اس لیے وہ بھی آکر افغانستان میں سرمایہ کاری کریں۔
افغانستان الیکٹرسٹی کمپنی نے 77 ترک کنسٹرکشن کمپنی اور زولارستان کمپنی کے ساتھ 42.5 ملین امریکی ڈالر کے معاہدوں پر دستخط کیے ہیں، جن کے ساتھ اس معاہدے میں افغان کمپنیاں زازو افغانستان اور کابل نیشنل کمپنی بھی شراکت دار ہیں۔ بجلی کے شعبے میں ہونے والے ان دو ترقیاتی منصوبوں میں کابل ضلع سروبی کے نغلو پاور سٹیشن میں 22.75 میگا واٹ شمسی توانائی کی پیداوار کے لیے آلات کی تنصیب، ہرات پل ہاشمی سٹیشن کی تعمیر، سیارو سٹیشن کی تعمیر، ہرات نورالجہاد سب سٹیشن سے پل ہاشمی تک ٹرانسمیشن لائن کی تنصیب کے منصوبے شامل ہیں۔
علاوہ ازیں وزارت پانی و توانائی اور وزارت خزانہ نے کمال ظفر گروپ آف کمپنیز اور نیو عمری کنسٹرکشن کمپنی کے ساتھ 690.6 ملین افغانی مالیت کے دو تعمیراتی منصوبوں کے معاہدوں پر دستخط کیے ہیں جس میں کابل شہر میں ملت کمرشل مارکیٹ اور ہلمند شہر میں لقمان حکیم تجارتی اور رہائشی مارکیٹ کی تعمیر شامل ہے۔
یہ بات قابل غور ہے کہ ان معاہدوں پر دستخط اور عمل درآمد سے بجلی کی کمی کا مسئلہ بڑی حد تک حل ہو جائے گا جس سے ہزاروں شہریوں کو بجلی اور روزگار فراہم ہوگا اور امارت اسلامیہ کے خزانے میں سالانہ لاکھوں افغانی جمع ہوں گے۔
