کابل، د غوايي ۱۵مه، باختر
هرات ولایت ته د ترکمنستان هېواد د سوداګرو او صنعت کارانو اتحادیې د رئیس نوکر قلي اناقلي اف په مشرۍ یوه لوړ پوړي سوداګریز پلاوي سفر کړی دی.
د هرات ولایت د صنعت او سوداګرۍ رئیس مولوي بشیر محمد سیرت باختر آژانس سره د خبرو پرمهال وویل، چې دغه پلاوي د سیخ ګول تړون د کولو، د دواړو لوریو ترمنځ د سوداګریزو اړیکو پراختیا، له خصوصي سکتور سره ناستې، د افغانستان له سوداګریزو سیمه څخه لیدنه، له افغانستان څخه ترکمنستان ته د ساختماني موادو په ځانګړي ډول د مرمر ډبرو د صادراتو په اړه د افغان لوري د وړاندیزونو د څېړلو په موخه هرات ته سفر کړی دی.
له بلی خوا؛ د هرات د صنايعو او کانونو د خونې رييس حميدالله خادم د باختر آژانس خبريال ته وويل، چې دغه پلاوی په پام کې لري د هرات د مرمر ډبرو له فابريکې څخه ليدنه وکړي او دواړه خواوې به له دغه ولايت څخه ترکمنستان ته د مرمر ډبرو د صادراتو په باب یو هوکړه لیک لاسلیک کړي.
دا سفر په داسې حال کې کېږي چې تېر کال په وري میاشت کې د افغانستان اسلامي امارت د صنعت او سوداګرۍ سرپرست وزیر نورالدین عزیزي ترکمنستان ته د خپل سفر په ترڅ کې دغه هېواد ته د افغانستان د صادراتو دروازه پرانیسته او هلته یې د افغانستان د صنایعو یو نندارتون جوړ کړ.
