جنايتکاران نه شي کولاى د افغانستان او اماراتو اړيکې خرابې کړي

کابل باختر دمرغومي دمياشتې  ٢٢ :
د افغانستان د بهرنيو چارو وزارت دقندهار د والي په دفترکې د پرون ماښام  تروريستي چاودنه چې په افغانستان کې د عربي متحده اماراتو د سفير او د قندهار د والي په ګډون د يوشمېرکسانو د ټپي کيدو او د قندهار ولايت د مرستيال، په قندهارکې دبهرنيو چارو وزارت  دنمايندګۍ رئيس او په  واشنګټن ډي سي کې د افغانستان د سفارت د يوه ديپلومات په  ګډون د يو شمېر نورو د شهادت سبب شو؛ په کلکه وغانده او هغه يې د اسلامي موازينو او  دديپلوماتيک  خونديتوب دمنل شويو اصولو سره په څرګند مخالفت کې وباله.
دباخترآژانس دخبرله مخې : په هغې اعلاميه کې  چې ددغې تروريستي پيښې په اړوند دبهرنيو چارو د وزارت له خوا خپره شوې ده، ويل شوي دي : دغه تروريستي چاودنه په داسې  حال کې رامنځته شوه چې  په افغانستان کې دعربي متحده اماراتو  سفير او د سفارت يوشمېر ديپلوماتان ديوه روزنتون دپرانستلو او د شهيدانو له کورنيو او له بې سرپرستو ماشومانو سره د مرستې لپاره دقندهار ولايت  ته سفر کړى و چې له دې امله د افغانستان د دولت اوخلکو د ژورې خواشينۍ سبب شوى دى.
جنايتکار تروريستان په دغه شان  وحشيانه عملونو سره په وار وار ثابته کړې ده  چې د افغانستان د خلکو او زموږ د نړيوالو دوستانو ګډ دښمنان دي. له همدې امله د بهرنيو چارو وزارت باور لري چې دغه تروريستي جنايت نه يوازې د دوو ورونوملتونو دوستانه اړيکې نه شي خرابولى، بلکې د دواړو هېوادونو او  د نړيوالې اجماع همکاري د تروريزم د اصلي جرړو د منځه وړلو لپاره دلازياتو  هلوځلو  اړتيا پياوړې کوي.
د بهرنيو چارو وزارت د الله (ج)  له دربار څخه ددغې غمجنې پيښې شهيدانو ته د فردوس  جنت ، دهغو کورنيو او د دوست هېواد عربي متحده اماراتو دولت او خلکو ته د خواخوږۍ د مراتبو په څرګندولو سره په افغانستان کې د عربي متحده  اماراتو سفير، د قندهار والي او نورو ټپيانو ته د سملاسي روغتياهيله کوي.