کابل (بی این اے) افغانستان کے قومی ادارہ شماریات و اطلاعات نے ملک میں 4 لاکھ میٹرک ٹن چاول کی پیداوار کی اطلاع دی ہے۔
مذکورہ ادارے کے پریس آفس نے ایک خبرنامہ شائع کرتے ہوئے کہا کہ رواں سال اس محکمہ کے تخمینہ کے مطابق ملک کے 16 صوبوں میں چاول کی کاشت کی گئی۔
خبرنامے میں کہا گیا ہے کہ چاول کے زیر کاشت کل رقبہ کا تخمینہ 129 ہزار ہیکٹر لگایا گیا ہے۔ بغلان اور لغمان صوبوں میں گزشتہ سال کے مقابلے میں چاول کی پیداوار میں اضافہ ہوا ہے۔
خبر میں مزید کہا گیا ہے کہ قندوز میں سب سے زیادہ رقبے پر چاول کاشت کیا گیا جو 39 ہزار ہیکٹر اراضی پر مشتمل ہے جب کہ سرپل سب سے کم چاول کاشت کرنے والا صوبہ ہے جہاں 160 ہیکٹر اراضی پر چاول کاشت کیا گیا۔
نیوز لیٹر کے مطابق رواں سال ملک میں چاول کی 4 لاکھ میٹرک ٹن پیداوار ہوئی ، سب سے زیادہ پیداوار قندوز میں ہوئی جو 1لاکھ 25 ہزار میٹرک ٹن ہے۔ اس کے بعد 88 ہزار میٹرک ٹن کے ساتھ تخار، 49 ہزار میٹرک ٹن سے زائد کے ساتھ بغلان، تقریباً 48 ہزار میٹرک ٹن کے ساتھ ننگرہار اور تقریباً 19 ہزار میٹرک ٹن کے ساتھ کنڑ ملک میں سب سے زیادہ چاول پیدا کرنے والے صوبوں میں شامل ہیں۔
جبکہ اس سال ملک میں چاول کی ضرورت کل 688 ہزار میٹرک ٹن ہے جس میں خوراک، بیج اور فضلہ شامل ہے۔
واضح رہے کہ قومی ادارہ برائے شماریات و اطلاعات نے ریموٹ سینسنگ ٹیکنالوجی کا استعمال کرتے ہوئے جس میں سیٹلائٹ تصاویر کی تشریح شامل ہے، 2023 میں ملک میں چاول کی کاشت کے علاقوں کا تعین کیا، جب کہ جغرافیائی معلوماتی نظام میں پودے لگانے سے لے کر کٹائی تک سیٹلائٹ تصاویر کا تجزیہ کیا گیا۔
