کابل (بی این اے) جمعیت علمائے اسلام کے سربراہ مولانا فضل الرحمان اور ان کے وفد نے افغان وزیر امور و آباد کاری مہاجرین خلیل الرحمان حقانی سے ملاقات کی۔
اس ملاقات میں پاکستان میں مقیم افغان مہاجرین کے مسائل پر تبادلہ خیال کیا گیا۔
خلیل الرحمن حقانی نے اس ملاقات میں کہا کہ پاکستان کو افغان مہاجرین کی 40 سالہ میزبانی اور مہمان نوازی کو ضائع نہیں کرنا چاہیے اور مہاجرین کو رضاکارانہ اور بتدریج وطن واپسی کے لیے وقت دیا جانا چاہیے۔
ساتھ ہی مذکورہ وزارت کے پیشہ ورانہ امور کے سیکریٹری مولوی عبدالرحمن راشد نے پاکستان کے علمائے کرام سے مطالبہ کیا کہ وہ اپنی مذہبی اور شرعی ذمہ داری کے مطابق مہاجرین کے بارے میں آواز اٹھائیں تاکہ مہاجرین سے ہونے والا برا سلوک بند کیا جائے۔
مولانا فضل الرحمان نے کہا کہ ان کے دورہ افغانستان کا مقصد مسائل پر بات کرنا اور ان کے حل کے لیے مشترکہ کوششیں کرنا ہے۔
انہوں نے مزید کہا کہ مہاجرین کے معاملے پر امارت اسلامیہ کے ساتھ مکمل ہم آہنگی ہے۔
