کابل، د لېندۍ ۵مه، باختر
د کونړولایت په مرکز اسعداباد کې د یوه کانال پر غاړه د ۸۰ متره استنادي دیوال جوړولو چارې پيل شوې.
د دغه ولایت والي مولوي قدرت الله حمزه باختر آژانس ته وویل چې دغه استنادي دیوال د سیلابونو د مخنیوي په موخه د ولایت مقام او بریښناکوټ د کانال په څنډو کې جوړېږي.
په ورته وخت کې د کونړ ولایت مقام مالي او اداري رییس مولوي الله نور حقیار وایې چې دغه استنادي دیوال ۸۰متره اوږدوالی ۴متره پلنوالی او ۵ متره لوړوالی لري او د موسمي سېلابونو د مخنیوي په موخه د ولایت د بوديجې څخه جوړېږي.
په همدې حال کې د یادې پروژې مسوول انجنير نصیر وایې چې د دغې پروژې چارې به په معیاري توګه ترسره کړي او په بشپړېدو سره به یې د سېلابونو د مخنیوي تر څنګ د ښار ښکلا هم زیاته شي.
دا په داسې حال کې ده، چې تر دې وړاندې د کونړ په ناړۍ ولسوالۍ کې هم د کونړ سیند څنډو ته د استنادي دیوالونو جوړولو چارې پيل شوې دي، چې په بشپړېدو سره به یې د سیمې د خلکو ستونزې هوارې شي.
