کابل، ۲۸ قوس، باختر
افغانستان اسلام امیرلیگی تشقی ایشلر وزیرلیگی نینگ سرپرست وزیری مولوی امیر خان متقی افغانستان اوز قوشنیلری، منطقه و دنیا بیلن یخشی مناسبتلرگه ایگه، اوز ارا همکارلیک ایشیکلری برچه اوچون آچیق، شو نینگ اوچون بو وضعیتنی ینهده کوچهیتیریش ضرورلیگینی تأکیدلهدی.
اوشبو وزیرلیک مطبوعات خدمتی اخبارات نامه سیده یازیلیشیچه، بو حقده مولوی متقی بویوک بریتانيا نینگ افغانستاندهگی ایلچیخانهسی نینگ وقتینچهلیک ایشلر وکیلی رابرت دکسن بیلن اوچرهشوو ایتگن.
دکسن وضعیتنی انسانپرورلیک یاردمی بیلن بیرگه اقتصادی و سیاسی مسألهلرنی رواجلنتیریش اوچون یخشی امکانیت دیب اتهدی و اولر تینچ و برقرار افغانستاننی ایستشلرینی، سیاسی مقصدلرگه ایریشیش اوچون زورآورلیکنی قطعیاً رد ایتیشلرینی و بو پوزیشننی رسماً اعلان قیلیشلرینی ایتدی.
شونینگدیک، او بیرلشگن ملتلر تشکیلاتی مخصوص معروضهچیسی نینگ سونگگی حساباتینی موازنتلی، دیب حسابلهدی.
افغانستان تشقی ایشلر وزیرلیگی نینگ سرپرست وزیری مولوی امیرخان متقی هم بیرلشگن ملتلر تشکیلاتی مخصوص معروضهچیسی نینگ یقیندهگی حساباتینی کوپ حاللرده ایجابی دیب حسابلهدی، بیراق او بو تکلیف نینگ افغانستان بوییچه ینگی وکیل تعیینلنیشی بولگن قِسمینی کوریب چیقمهدی.
مولوی متقی، «افغانستان هر بیر ساحهده کوندن – کونگه رواجلنماقده، قوشنی دولتلر، منطقه و دنیا بیلن یخشی علاقهلرگه ایگه، اوزارا همکارلیک ایشیکلری همه اوچون آچیق، شو نینگ اوچون بو وضعیتنی کوچهیتیریش کیرهک»، دیدی.
ایتیلیشیچه، متقی، شونینگدیک، ایکّی دولت اورتهسیدهگی علاقهلر رواجی و اینیقسه، تجارت – ساتیق درجهسی آرتیب بارهیاتگنیگه علیحده اورغو بیریب، افغانستان اسلام امیرلیگی تشقی ایشلر وزیرلیگی نینگ بریتانيادهگی قنسوللیک خدمتلری بارهسیدهگی خدماتینی تیلگه آلگن.