کابل، د غوایی ۹ مه، باختر
د بلخ امنیتي مسوولین وايي، چې د یاد ولایت په چهارکنت ولسوالۍ کې د یوې ترافیکي پېښې له امله د یوه ښوونځي ۶ تنو ته مرګ ژوبله اوښتې ده.
د بلخ ولایت د امنیې قوماندانۍ ویاند حافظ محمد عیسی وثیق د باختر آژانس خبریال ته ویلي، چې د بلخ د چهار کنت ولسوالۍ په خواجه قفتال کلي کې د ښوونځي زده کوونکو یو موټر له سړک اوښتی چې په کې یو زده کوونکی مړ او د موټر چلوونکي په ګډون ۵ نور ټپیان شوي دي.
د یادونې وړده، چې د پېښې ټپیان د درملنې په موخه روغتون ته لېږدول شوي دي.
