کابل باختر/ دزمري دمياشتې ١٤ :
په افغانستان کې د ملکي وګړو د سر د زيان شمېرمخ په زياتوالي دى.
د افغانستان د بشر د حقوقو د خپلواک کميسيون مسوولينو ويلي دي چې په تيرو شپږو مياشتوکې په افغانستان کې د ملکي وګړو د سر د زيان شمېر په سلوکې نږدې ٣٠ زيات شوى دى.
د بشر د حقوقو د خپلواک کميسيون وياندرفيع الله بيدار رسنيو ته وويل: د افغانستان د بشر د حقوقو خپلواک کميسيون د ١٣٩٣ کال په وروستيو دريو مياشتو او د ١٣٩٤ کال د ثور او غبرګولي په مياشتوکې چې ټولې شپږ مياشتې کيږي؛ د ملکي وګړو ارقام او رپوټونه راټول کړي، د ددې څرګندوى دي چې په همدې موده کې درې زره ١٢٢ تنو ته مرګ ژوبله اوښتې ده چې له دې جملې څخه ١٢٩٣ تنه وژل شوي او ١٨٢٥ تنه ټپيان شوي دي چې دغه ارقام د دې څرګندوى دي چې په هېوادکې د ملکي وګړو د سر د زيان شمېر په سلوکې نږدې ٣٠ زيات شوى دى.
ده وويل چې جګړې، د ماين چاودنې، ځانمرګي بريدونه او يرغمل نيونې دملکي وګړو د سر د زيان د شمېر د زياتوالي عامل دي او د دغو پيښو زياتره قربانيان ښځې او ماشومان دي او د ملکي وګړو د سر د زيان د شمېر په زياتوالي کې په سلو کې ٧٥ وسله وال مخالفين، په سلوکې څه دپاسه ٧ دولتي ځواکونه او نړيوال ملاتړي شامل دي؛ خوپه سلوکې ١٦ نور يې معلوم نه دي.
يوناما په کابل کې د ملګرو ملتو د سازمان د معاونيت د هيئت دفتر په افغانستان کې د ملکي وګړو د سر د زيان د زياتوالي خبرې کړې دي او ويلي يې دي چې په څو وروستيو مياشتوکې د افغانستان په يوشمېر ولايتونوکې نا امنيو او د وسله والو مخالفينو بريدونو زور اخيستى دى او ټاکل شوې ده يوناما په ډير لنډ ممکن وخت کې خپل رپوټ خپورکړي.
د افغانستان د دفاع وزارت مقاماتو ويلي دي چې کله ناکله افغان ځواکونه په ځينو زيانمنوونکو سيموکې د ملکي وګړو د سر د زيان د مخنيوې په خاطر تکتيکي په شاتګ کوي؛ خو افغان کارپوهان په دې باور دي چې د وسله والو مخالفينو له خوا د بريدونو په وخت کې د جګړې قوانين په پام کې نه نيول کيږي او همدغه مسئله ملکي وګړو ته د سر د زيان د اوښتو سبب کيږي .
