کابل ۹ ثور باختر
افغانستان اسلام امیرلیگی باش وزیرلیک ادارهسی نینگ سیاسی اورینباسری ایران نینگ کابلدهگی ایلچیسی بیلن اوچرهشوویده افغانستان اسلام امیرلیگی نینگ برچه مملکتلرگه موقفی یخشی مناسبتلر و اوزارا حرمت محیطیده همکارلیکنی رواجلنتیریش ایکنینی تأکیدلهدی.
ارگ اخبارات نامهسیده شوندهی یازهدی: باش وزیرلیک ادارهسی نینگ سیاسی اورینباسری مولوی عبدالکبیر یقینده ایران اسلام جمهور رئیسی نینگ افغانستان بوییچه مخصوص وکیلی و اوشه مملکت نینگ کابلدهگی ایلچیسی سید حسن کاظمی قُمی بیلن اوچرهشدی.
بو اوچرهشووده سید حسن کاظمی قُمی شوندهی دیدی: خارجی هیئتلر نینگ آخرگی پیتلرده آرتیب بارهیاتگن کابلگه تشریفی اسلام امیرلیگی نینگ سیاسی میداندهگی ترقیاتی و دنیا بیلن یخشی همکارلیک قیلیشی دیمکدیر.
قُمی اوز مملکتی نینگ افغانستان بیلن سوو خۉجهلیگی، ساغلیقنی سقلش، اقتصاد، عالی تعلیم و اطراف-محیطنی محافظه قیلیش ساحهلریده همکارلیک قیلیشیگه ایشانتیردی. بیراق بیر قنچه یونهلیشلر کابل و تهران مناسبتلریگه پوتور (خدشه) ییتکزیشگه حرکت قیلماقده.
ایران اسلام جمهوریتی نینگ مخصوص وکیلی و ایلچیسیگه کوره؛ افغانستانلیک و ایرانلیک عالِملر نینگ قوشمه اوچرهشووی ایکّی تامان اوچون هم همکارلیک اوچون یخشی اساس بولیشی ممکن.
باش وزیرلیک ادارهسی سیاسی اورینباسری مولوی عبدالکبیر صهیونیست اسرائیل ریجیمی نینگ منطقهدهگی اشغال هجوملرینی قارهلب، شوندهی دیدی: افغانستان اسلام امیرلیگی منطقهده ترنگلیک نینگ کینگهییشی طرفداری ایمس و معما نینگ یگانه ییچیمی اسرائیل قوشینلری نینگ غزه دن چیقیب کیتیشیدیر.
مولوی عبدالکبیر افغانستان اسلام امیرلیگی ایران اسلام جمهوریتی بیلن یخشی سیاسی، اقتصادی و مدنی علاقهلر اورنهتیلیشینی ایستشینی و بو دولتنی افغان مهاجرلرینی قبول قیلگنی اوچون قدرلشینی قوشیمچه قیلدی.
شو بیلن بیرگه، باش وزیرلیک ادارهسی نینگ سیاسی اورینباسری قوشنی دولتلردن افغان مهاجرلری نینگ مجبوری دیپورت قیلینیشی مناسبتی بیلن صبر و بغریکینگلیک کورسهتیشنی همده ایراندهگی افغان مهاجرلری نینگ معمالری حل ایتیلیشینی سوردی.
مولوی عبدالکبیر ایرانلیک سرمایهدارلردن افغانستانگه سرمایه کیریتیشنی سوردی و اسلام امیرلیگی منطقه برقرارلیگی و ترقیاتینی کینگهیتیریش مقصدیده منطقه دولتلری بیلن همکارلیک قیلیشگه صادق ایکنینی بیلدیردی.
باش وزیرلیک ادارهسی نینگ سیاسی اورینباسری، شونینگدیک، افغانستان اسلام امیرلیگی نینگ برچه مملکتلرگه موقفی یخشی مناسبتلر و اوزارا حرمت محیطیده اوزارا همکارلیکنی رواجلنتیریش ایکنلیگینی، منطقه دولتلری هم منطقوی لایحهلرنی عملگه آشیریشده اشتراک ایتیشی کیرهکلیگینی قوشیمچه قیلدی.