دوشنبه/نیوزنو/باختر/2 جوزا
به گفته ریس کمیتۀ دولتی امنیت ملی تاجکستان ده ها تاجیک در کنار تندروان در شمال افغانستان می جنگند.
نصرت الله میرزایف، ریس کمیته امنیت ملی تاجکستان در یک نشست در تاجکستان به تازه گی گفته است که شمار این تاجیک ها به سی تن می رسد.
بر اساس گزارش ها، این مقام تاجکستان بخاطر ناامنی‌ها در شمال افغانستان ابراز نگرانی کرده است.
شاه ولی الله ادیب سرپرست ولایت بدخشان در صحبت با رادیو آزادی حضور جنگجویان تاجیک را دربرخی مناطق بدخشان تأیید کرده و گفته است که اتباع خارجی از کشورهای مختلف به شمول ازبیکستان، چیچن و تاجکستان و کشورهای دیگر دخیل در قضیۀ ناامنی افغانستان هستند.
به اساس همین خبر رئیس کمیتۀ دولتی امنیت ملی تاجکستان گفته است که تنها از آغاز امسال، گروه های افراطی چهل اقدام تروریستی را در مناطق مختلف افغانستان انجام داده اند.
به گفته وی در نتیجه این فعالیت‌های تروریستی ۱۵۰ غیر نظامی کشته و ۱۰۰ تن دیگر زخمی شده‌اند.
