حکومت په لغمان کې له جګړې ځپلو کسانو سره د مرستې بهیر پیل کړ

کابل / د غبرګولي ۷ مه/ باختر

په داسې حال کې چې تر اوسه د لغمان په ځینو برخو کې جګړې دوام  لري حکومت  له جګړې ځپلو سره د مرستې بهیر پیل کړ.

په تيره  يوه  مياشت کې د وسله والو د بريدونو په تعقيب، لغمان  د سختو جګړو  ډګر دی.

دغو جګړو په زرګونو کليوال د خپلو کورونو پريښودو ته اړ کړي او له کومو آسانتياو پرته په ښار کې استوګن شي.

له طبيعي پيښو سره د مبارزې  وزير لغمان ته سفر وکړ تر څو  زرګونو جګړه ځپلو ته د مرستې رسولو لارې چارې و څېړي.

غلام بهاوالدین جیلاني د لغمان له والي رحمت الله یارمل سره  په کتنه کې وویل؛ ډير ژر به په جګړې  ځپلو کورنیو د نغدي مرستو او د خوراکي توکو د ويشلو بهیر پیل کړي.

هغه وویل ؛ له کورنیو او نړیوالو مرستندویو بنسټونو سره په اړیکه کې دی چې د لغمان جګړې ځپلو کورنیو ته  زیاتې  مرستې برابرې کړي.

له طبيعي پيښو سره د رسيدګۍ په چارو کې ددولت وزیر وویل؛ ټاکل شوې ده په لومړۍ ګام کې له سلګونو بېځایه شویو کورنیو سره بشردوستانه مرسته وکړي.

همدا اوس د لغمان کې له جګړو څخه په  زرګونو بېځایه شوې کورنې چې په ښار کې شپې سبا کوي  سرپناه ، خوراکي توکي، درمل او د ژوندانه لومړنيو توکو ته  اړتيا لري.

د هېواد په ختیځ کې جګپوړی پوځي مقام وايی دوى  په دې بریالي شوي دي چې  وسله وال طالبان له الینګار، الیشنګ او  ددغو ولسواليو  له لارو څخه د  مهترلام ښار ته وشړي، په داسې حال کې چې تراوسه هم د دولت شاه ولسوالۍ د وسله والوطالبانو په لاس کې ده .

پاى \ جهانیار