کابل / باختر د لړم دمياشتې ١ :
په ژورې خواشينۍ سره مو خبر ترلاسه کړ چې د هېواد علمي او سياسي شخصيت ، دافغانستان دملت داسلامي وحدت ګوند مشر، په ولسي جرګه کې دکابل دخلکو استازى او دافغانستان دملي ايتلاف دمشرتابه شورا غړى حجت الاسلام والمسلمين استاد قربانعلي عرفاني په حق رسيدلى دى .
د دغه رباني عالم ، مطرح شخصيت او د جهاد او مقاومت له فاخروڅيرو او دافغانستان دملي اتل شهيد احمدشاه مسعود د همسنګرانو د مړينې خبر موږ او دافغانستان داسلامي جمهوري دولت په اجرائيه رياست کې زموږ ټول همکاران او ملګري او داصلاحاتو اوهمپالنې د ټيم غړو ته دردونکى و.
ارواښاد يو نه ستړې کيدونکى مبارز او دافغانستان دجهاد دمشرانو په ډله کې يوه پيژندل شوې څيره وه چې د خپل عمر زيات کلونه يې په جهاد او مجاهدت او په تيره بيا په فرهنګي اوسياسي برخو کې په هلو ځلو سره تيرکړل او دعامه ذهنونو په روښانولو او د آزادۍ او عدالت د فرهنګ په رواجولو کې اغيزمن رول درلود .
ښاغلى عرفاني د وروستيو اتو کلونو په بهيرکې د يو وفادار او ژمن دوست په توګه او د افغانستان د خلکو د آرمانونو د دفاع په مقصد زموږ ترڅنګ ودريد او د خپلو خلکو له اساسي حقوقو او آزاديو څخه يې په ميړانه دفاع وکړه .
د دغه ګران دوست اوپوه سياستوال نشتوالى دجهاد او سياست د برخو ټولو همکارانو او دوستانو او په تيره بيا د ارواښاد درنې کورنۍ ته ډاډګيرنه وايو او دالله (ج) له دربارڅخه ارواښــاد ته د فردوس جنت او پاتې کسانو ته يې د جميل صبر هيله کوو.
