کابل/باختر/ دچنګاښ ٥مه
د وزیرانو شورا د پریکړې پر اساس د کورنیو کرنیزو محصولاتو د کارونې او یادو توکو ته د بهرني او کورني بازار موندنې په موخه جوړ شوي کمېسیون د اجرائیه ریاست د لومړي مرستيال انجنیر محمدخان په مشرۍ نن د وزیرانو شورا په مرمرینه ماڼۍ کې غونډه وکړه.
د اجراییه ریاست د ویاند دفتر باختر آژانس ته خبر ورکړ:
په غونډه کې چې د ملي دفاع، کورنیو چارو، کلیو پراختیا، کرنې او سوداګرۍ او صنایعو وزارتونو او سوداګرۍ خونې او ملي تدارکاتو ادارو استازو ګډون کړی و، د له کورنیو کرنیزو محصولاتو څخه د ښې او پر ځای ګټې اخیستنې په لارو چارو او دغه محصولاتو ته په هېواد کې دننه او بهر د مارکیټونو په پیدا کولو خبرې او بحث وشو.
د کرنې وزارت د خصوصي سکټور رئیس حبیب الله حبیب په هېواد کې د تېر کال په پرتله سږ کال د کرنیزو توکو د درې برابره زیاتوالی څخه یادونه وکړه او ویې ویل: " کرنیزو توکو ته باید په هېواد دننه او بهر مارکیټونه پیدا او د عامه پوهاوي له لارې خلک دیته وهڅول شي تر څو کورني کرنیز توکي وکاروي."
د کرنې وزارت د خصوصي سکټور رئیس د کورنیو زراغتي توکو د کارولو لپاره د یو شمېر اتحادیو جوړولو خبر ورکړ، خو ویې ویل چې یادې اتحادیې لا هم د کار جوازونه نه لري او عدلیه وزارت باید د موقتي حل لپاره دغه اتحادیو ته د کار جوازونه ورکړي.
د ملي دفاع او کورنیو چارو وزارت مسوولینو د کورنیو زراعتي او خوراکي توکو په کارونې ټینګار وکړ او ویې ویل چې یاد وزارتونه د ولسمشر له حکم سره سم له کورنیو محصولاتو کار اخلي.
د کمېسیون مشر او د اجرائیه ریاست لومړي مرستيال انجنیر محمدخان په کرنیزو او نورو برخو کې د داخلی توکو په کارولو ټینګار وکړ او دایې د پانګوالو او بزګرانو د تشویق او په ځان بسیاینې په برخه کې مهم وبلل.
لومړي مرستيال د کرنې وزارت په مشرې یوې تخنیکې کمېټې ته چې د مالیې، عدلیې، سوداګرۍ او صنایعو، کلیو پراختیا وزارتونو او تدراکاتو ملي ادارې مسوولین به په کې ګډون ولري دنده وسپارله تر څو کورنیو کرنیزو توکو ته د بازار موندنې او د دغه توکو د کارولو لپاره د عامه پوهاوي په لارو چارو تخنیکي بحث وکړي او همدارنګه د عدلیې وزارت سره په ګډه هغو اتحادیو ته چې په همدغه برخه کې فعالیت ته چمتو دی د جواز ستونزه حل او پایلې یې د وروستیو پریکړو لپاره وزیرانو شورا ته واستوي.
پای – ذ
