کابل، ۲۰ جدی، باختر
بوگون مرمر سراییده باش وزیرلیک اداره سی نینگ اقتصاد اورینباسری ملا عبدالغنی برادر آخوند رئیسلیگیده اقتصادیات کمیسیونی نینگ نوبتدهگی ییغیلیشی بولیب اوتدی.
باش وزیرلیک اداره سی نینگ اقتصادی یاردم کورسهتیش باشقرمه سی نینگ باختر آژانسیگه بیرگن معلوماتلریگه کوره؛ اوشبو ییغیلیشده باتفصیل بحثدن سونگ افغانستان تیمیر یول باشقرمه سی هراتدن تورغندی و اندخویدن مزار شریفگچه بولگن تیمیر یول ترماغی ایشلرینی یکونلشی توغریسیده قرار قبول قیلیندی.
شونینگدیک، مذکور آژانس هراتدن قندههارگچه بولگن تیمیر یولنی سپین بولدهکگچه اوزهیتیریش بوییچه کینگ قمراولی ریجه ایشلب چیقیش و تکلیفلر بیلن اقتصادی یاردمچیگه تقدیم ایتیش وظیفهسی یوکلهتیلدی.
اقتصادی کمیسیون اشتراکچیلری نینگ فکریچه؛ اوشبو ترماقلر توگللنیشی بیلن افغانستان و مرکزی آسیا دولتلری اورتهسیدهگی تجارت و ترانزیت درجهسی آشهدی و بو بارهده کوپلب قولهیلیکلر یرهتیلهدی.
مذکور ییغیلیشده مالیه وزیرلیگی نینگ پودرتچی تشکیلاتلر نینگ فتحدن آلدین قالگن ۱۰ فایز کفالت، و طلبلرینی دولت ارگانلریگه تولش بارهسیدهگی حرکتلری هم معقوللندی.
اقتصادی کمیسیون مجلسیده تاپی لایحه کاتبیتینی شکللنتیریش تصدیقلندی و اونی شکللنتیریش مقصدیده تشکیلات و ایش حقی کمیسیونیگه تاپشیریلدی.
تاپی لایحهسی کاتبیتی لایحه نینگ تخنیکی و حقوقی ایشلرینی عملگه آشیرهدیگن سوو و برق وزیرلیگی باشچیلیگیدهگی تیگیشلی ترماق وزیرلیکلریدن عبارت دیر.
شونینگدیک، ییغیلیشده افغانستان فنلر اکادمیسی تامانیدن تاووقلرنی سوییش بوییچه ایشلب چیقیلگن یوریقنامهلر ملی آزوق-اوقات و فارمسیون باشقرمه سی توصیهلرینی انابتگه آلگن حالده معقوللندی و ایکینچیلیک، ییرلرنی سوغاریش و چارواچیلیک وزیرلیگیگه کورسهتمهلرگه عمل قیلیش مجبوريهتی یوکلندی.
ییغیلیش یکونیده کینگ کولملی بهالشدن سونگ افغانستان پُست شرکتیگه ترانزیت ترانسپورت واسطهلریگه «جی.پی.اس» اورنهتیش بوییچه شرطنامه تاپشیریلدی و اوشبو شرکت بیر آی مدتده اوشبو مسألهگه جواب بیریش مجبوريهتینی یوکلهدی.
ایسلهتیب اوتمیز، اوشبو شرطنامهگه کوره، افغان پُست شرکتی هر بیر ترانزیت ترانسپورت واسطهسیگه ۴۱ دالرلیک تولاو عوضیگه «جی.پی.اس» اورنهتهدی.