کابل باختر 4 عقرب
حامد کرزی رییس جمهوری پیشین کشور و معاونان پیشین ریاست جمهوری، با سرپرست ریاست جمهوری اسلامی افغانستان دیدار کردند.
دفتر مطبوعاتی ریاست جمهوری به آژانس باختر خبر داد،حامد کرزی، رییس جمهور پیشین کشوربا محمد یونس قانونی و استاد محمد کریم خلیلی، معاونین پیشین ریاست جمهوری، امروز در قصر صدارت ، با قانونپوه سرور دانش سرپرست ریاست جمهوری اسلامی افغانستان دیدار نموده و انتخاب وی را به معاونیت دوم ریاست جمهوری تبریک گفتند.
در این دیدار رییس جمهور پیشین و معاونین پیشین ریاست جمهوری برای حکومت وحدت ملی، رییس جمهور منتخب کشور و معاونین وی آرزوی موفقیت کرده و ابراز امیدواری نمودند که در سایه این حکومت، افغانستان به صلح پایدار، آبادانی و امنیت سراسری دست یابد.
سرپرست ریاست جمهوری نیز از حضور آنان در دفتر کار خود، اظهار قدردانی نموده و به نوبه خود برای آنها آرزوی سلامتی و طول عمر با عزت نمود.
سرور دانش هم چنین افغانستان امروز را با تمام دستاوردهایش محصول رهبری خردمندانه رییس جمهور پیشین و معاونین شان دانسته و یک بار دیگر بر تعهد و پای بندی حکومت وحدت ملی در راستای صلح و آبادانی کشور تاکید ورزید.
