کابل، د سلواغې ۳۰مه، باختر
د کډوالو او راستنېدونوکو چارو وزارت مسلکي معین مولوي عبدالرحمن راشد په افغانستان کې د ملګرو ملتونو د پناه غوښتونکو د عالي کمېشنرۍ له رییس ښاغلي لیونارد زولو سره په خپل کاري دفتر کې وکتل.
په دې کتنه کې د پخوانيو پروژو په برخه کې د وزارت او دغه کمېسیون ترمنځ د همغږۍ او همکارۍ په اړه خبرې وشوې.
مولوي عبدالرحمن راشد په دوه اړخیزه همکارۍ، د ژمنو په پوره کولو، د دواړو لوریو ترمنځ د باور په لا زیاتولو، د ستونزو په حل او له دغه کمېسیون څخه د خدمتونو په وړاندې کولو باندې ټینګار وکړ.
ورته مهال لیونارد زولو له دغه کمېسیون سره د دغه وزارت د همکارۍ او همغږۍ ستاینه وکړه او په راتلونکي کې یې هم له خپلو همکارانو سره په بېلابېلو برخو کې ددغې ادارې د ملاتړ ډاډ ورکړ.
