کابل باختر د وږي دمياشتې ٤ :
د قوانينو د کميټې غونډه نن د جمهور رئيس دمرستيال او د دغې کميټې د رئيس قانونپوه سرور دانش په مشرۍ جوړه شوه .
د جمهوري رياست مطبوعاتي دفتر باختر آژانس ته خبر ورکړ:
په دې غونډه کې د ستراتيژيکي مالونو او خدمتونو د کنترول د قانون د طرحې په باب غور او څيړنه وشوه او په پاى کې په دې باب لازمې پريکړې وشوې.
دغونډې په پيل کې د عدليې وزير د دغو قوانينو د طرحې د برابرولو داړتيا په باب غونډې ته رپوټ وړاندې کړ .
د بېلابېلو نړيوالوکنوانسيونونو، پروتوکولونو او پريکړه ليکونو رعايتول او د هېواد په قوانينوکې د اړوندو نړيوالو تړونونو د مفادو منعکس کول او داړندو برخو قانونمند کيدل د دغه قانون د طرحې د برابرولو له اړتياوو څخه وبلل شول.
دقانون په دې طرحه کې د کيمياوي، بيولوژيکي او اټومي وسلو په پيژندنې پورې اړوندې چارې شاملې دي او د هغې له مخې د هغو د توليد، وارداتو، صادراتو ، ترانزيت او کارولو د مخنيوي جوړښتونه ټاکل کيږي.
د قانون د دغې طرحې کلي هدف په ناوړو او غير سوله ييزو مقصدونو د هغو دنه کارولو په باب د ډاډ دترلاسه کولو لپاره ددغو مالونو د توليد، صادراتو او ترانزيت څارنه ده .
وروسته د غونډې غړو د دغه قانون د طرحې په باب په دقت سره غور او څيړنه وکړه او د هغې د پلې کوونکې مرجع په ګډون په بېلابېلو مواردوکې خپلې اصلاحي نظريې بيان کړې.
له څيړنې او خبرو وروسته کميټې پريکړه وکړه چې دقانون په دغې طرحې دې يوځل بيا د اړوندو واکمنو استازو له خوا زيات غور او دقت وشي او بيا دې د قوانينوکميټې ته وړاندې شي .
د غونډې په بله برخه کې د جزا دقانون د پنځمې ګنې ضميمې د مسودې په باب هم خبرې وشوې او د غونډې غړو د تښتونې، د تښتونې د جرم د مجازاتو، د تښتونې د جرم د مشدده حالاتو او د نورو طرحه شويو موضوعګانو د تعريف په برخه کې خپلې نظريې بيان کړې.
کميټې په اصولوکې د دغې ضميمې مسوده تائيدکړه او د کميټې دارالانشا ته يې دنده وسپارله چې د غونډې د غړو له خوا طرحه شوې اصلاحي نظريې دې په مسوده کې شاملې او هغه دې کابينې ته وړاندې کړي.
