کندز/ باختر د لړم دمياشتې ٨ مه :
د کندز ښار د حوزوي او خصوصي روغتونونو په لسګونه تنه موظفو ډاکترانو پرون په کاري اعتصاب لاس پورې کړ.
د باختر آژانس د خبرله مخې:
دغه ډاکتران ددغه ولايت دحوزوي روغتون په انګړکې راټول شول او د نا امنيو او د روغتيايي کارکوونکو د نه خونديتوب، د انسان تښتونو په تېره بيا د يو ډاکتر د زوى دتښتونې په باب چې څو ورځې مخکې تښتول شوى دى، اعتراض وکړ .
د کندز د حوزوي روغتون متخصص ترينر ډاکتر عبداللطيف شريفي رسنيو ته وويل چې مخکې له دې د ډاکترانو ماشومان تښتول شوي و، خو امنيتي مسوولينو د هغوى د ژغورنې په باب کوم کار ونه کړ او ډاکترانو خپل ماشومان د پيسو په بدل کې خوشې کړل .
ده زياته کړه چې تېره اوونۍ د ډاکتر عبدالستار غفورزي د ښوونځى په لاره کې د انسان تښتوونکو له خوا وتښتول شو. خو تر اوسه پورې د تښتول شوي ماشوم په باب هيڅ معلومات نه دي ترلاسه شوي .
دغه راز يوشمېر نورو ډاکترانو هم د امنيت د نشتوالي او موجودو ګواښونو په اړوند انتقاد وکړ او له دولت څخه يې د خپلو کورنيو د امنيت د تامينولو غوښتنه وکړه او زياته يې کړه چې همدا اوس په روغتونونو او شخصي کلينکونوکې د دوى کاري اعتصاب دوام لري او تر هغه پورې چې د تښتول شوي ماشوم درک معلوم نه شي، چمتو نه دي چې خپل کار ته دوام ورکړي .
د کندز د ولايتي شورا رييس امر الدين ولي هم د ډاکترانو اعتراض پرځاى وباله او ويې ويل چې بايد دولت د ډاکترانو غوښتنو ته پاملرنه وکړي .
د کندز ولايت د حوزوي روغتون رييس ډاکتر محمد نعيم منګل هم د ډاکترانو د غوښتنو دفاع وکړه او له امنيتي مسوولينو څخه يې وغوښتل چې د دغه ماشوم په خوشې کولو او دغه راز د ډاکترانو او د هغوى د کورنيو د امنيت په تامينولو کې جدي هلې ځلې وکړي .
خو ده څرګنده کړه چې د ډاکترانو کاري اعتصاب په شخصي کلينيکونو پورې مربوط دي او ولايتي روغتون دغه راز د ناروغانو په خدمت کې دي.
په همدې حال کې هغه ناروغان چې له شخصي کلينکونو څخه حوزوي روغتون ته راغلي وو، د خدمتونو په نشتوالي انتقاد وکړ .
دغه راز په همدې حال کې د کندز ولايت امنيه قوماندان جنرال عبدالحميد حميدي د ډاکترانو اعتراض يو مدني حرکت او د هغوى حق وباله او زياته يې کړه چې ټول کشفي او استخباراتي بنسټونه هلې ځلې کوي چې تښتول شوي ماشوم وژغوري .
ده زياته کړه: په دې باب يوه اندازه کارونه ترسره شوي دي چې ښايي دغه ماشوم ډير ژر د انسان تښتوونکو له منګولو څخه خوشې شي .
