حامدکرزي او راسموسن له ٢٠١٤ م کال وروسته په افغانستان کې د ناټو د شتون دڅرنګوالى په باب د خبرو په دوام باندې ټينګار وکړ.

کابل  باخترد   ثور  دمياشتې  ٤ :
دافغانستان داسلامي جمهوريت جمهور رييس حامدکرزي دبلجيم هيواد ته دخپل سفرپه لومړۍ ورځ پرون مازيګر د ناټو دسازمان له سرمنشي اندرس فوگ راسموسن  سره وکتل.
دجمهوري رياست  مطبوعاتي دفتر باخترآژانس ته خبرورکړ: په دې کتنه کې چې په بروکسل ښارکې دناټو دسازمان په مقرکې وشوه؛ دواړو لورو له  ٢٠١٤ م کال  وروسته په افغانستان کې د ناټو د شتون په باب خبرې وکړې.
دهيواد جمهور رييس او د ناټو سرمنشي څرگنده کړه چې له ٢٠١٤ م  کال وروسته په افغانستان کې ددغه سازمان د شتون دڅرنګوالى په باب دافغانستان اوناټو ترمنځ  خبرې بايد دوام ومومي.
اندرس فوګ راسموسن ، جمهور رييس حامدکرزي ته د ښه راغلاست د ويلو په ترڅ کې څرگنده کړه: موږ به په نږدې راتلوونکي کې دافغان امنيتي ځواکونو له خوا دافغانستان دټولو امنيتي مسووليتونو د منلو شاهدان و اوسو او د دې کار ترسره کول يو مهم پرمختګ دى.
ده په دې ترڅ کې چې باثباته او خوندي افغانستان، د افغانستان دحکومت او دناټو ګډ هدف وباله، ټينګار يې وکړ چې ناټو تر ٢٠١٤ م  کال پورې او له هغه وروسته له افغانستان سره خپل ملاتړ ته دوام ورکوي.
جمهور رييس په برياليتوب سره دامنيتي مسووليتونو د ليږدونې دبهير دپرمختګ له امله  خوښي څرگنده کړه او ويې ويل چې افغانستان دخپلو امنيتي ځواکونو په واسطه  دخپلې  خاورې د ساتنې ځواکمنۍ لري.
جمهور رييس حامدکرزي زياته کړه چې افغانستان به په بشپړه توګه دخپلو خلکو د امنيت تامينولو ته چمتو وي.
جمهور رييس له  ٢٠١٤ ميلادي کال وروسته په افغانستان کې د ناټو دشتون د څرنګوالى په اړوند وويل چې بايد په دې باب دخبرو دپرمخ بيولو لپاره يو هيئت وټاکل شي. دغه راز د افغانستان داسلامي جمهوريت جمهور رييس حامدکرزي په بروکسل ښارکې په خپل استوګنځي کې د بلجيم د صدراعظم له مرستيال  او دبهرنيو چارو له وزير ديديه ريندارس  سره وکتل.
په دې کتنه کې دواړو لورو  د دواړو هيوادونو ترمنځ  د اړيکو او د علاقې وړ نورو موضوعګانو په باب خبرې وکړې.
ټاکل شوې ده دافغانستان داسلامي جمهوريت  جمهور رييس نن غرمه دافغانستان ، پاکستان او د امريکا په درې اړخيزه غونډه کې ګډون وکړي.