کابل باختر د کب لسمه :
د افغانستان لپاره د سيمه ئيزو اقتصادي همکاريو او د ريکا د پروژو د پرمختګ د څيړنې او د راتلوونکي لپاره د پروګرام جوړولو د کنفرانس ګردۍ ميز نن د بهرنيو چارو په وزارت کې جوړ شو.
د باخترآژانس دخبريال دخبر له مخې: په دې ګردۍ ميزکې په اقتصادي چاروکې د جمهور رييس ستر سلاکار شام لال بتيجا، د بهرنيو چارو وزارت سياسي معين ارشاد احمدي، د وزارتونو او د مرستندويو سازمانونو او هيوادونو واکمنو استازو، د مدني ټولنې غړو او د سوداګرۍ د خونو مسوولينوګډون کړى و.
برخه والو د ريکا د پروژې د عملي بهير او د وريښمو د لارې د بيا احياکولو د څرنګوالى، د ګاونډيوهيوادونوترمنځ د تجارتي او ترانزيتي موافقه ليک، د سيمې د طبيعي منابعو او انرژۍ په برخه کې د همکارۍ، د تابي د پروژې د کاسا _ ١٠٠٠ د پروژې دتطبيق، د اوسپنې پټلۍ د سيمې د اوسپنې د پټليو د نښلولو او د افغانستان د حلقوي سړک په باره کې خبرې وکړې.
د بهرنيوچارو وزارت د اقتصادي همکارۍ رييس وحيدالله ويسي خبريالانوته وويل چې په نننۍ ګردۍ ميزکې دافغانستان دسيمه ئيزې اقتصادي پروژې په باب چې په ٢٠١٢ ميلادي کال کې دتاجکستان په مرکز د وشنبه کې طرحه شوې وه؛ خبرې وشوې.
د دې د څرګندونو له مخې: په دغوبرخوکې ستونزې او پرمختګونه وڅيړل شول .
ده دغه راز څرګنده کړه چې ددغه ګردۍ ميز اساسي هدف دافغانستان له خوا د سيمه ييزې اقتصادي اجنډا وړاندې کول دي او اړوندو وزارتونو د خپلو کړنو او اجرا اتو رپوټونه په غونډه کې وړاندې کړل.
