کابل، ۲۸ جدی، باختر
افغانستان اسلام امیرلیگی مطبوعات کاتبی ذبيح الله مجاهد بیلن اوچره‌شوویده کان و پترولیم وزیرلیگی نینگ سرپرست وزیری شیخ الحدیث شهاب الدین دلاور اوشبو وزیرلیک نینگ ریجه‌لری و یوتوقلری حقیده معلومات بیردی.
اونینگ سوزلریگه کوره: هرات و قندهار ولایتلریده تورت یوز میلیون دالرلیک اوچته ییریک سمنت لایحه‌سی و محلی و خارجی کمپنیلر بیلن بیشته ییریک تیمیر قازیب آلیش لایحه‌سینی قوریش بوییچه شرطنامه امضالندی.
اوشبو ییغیلیشده کان و پترولیم وزیرلیگی نینگ سرپرست وزیری شرطنامه‌لرده شفّافلیکنی تأمینلش، ناقانونی قازیب آلیش و قاچاق نینگ آلدینی آلیش، مملکت مینیرال-خام اشیا ریسورسلرینی باشقه‌ریشنی ینه‌ده یخشیلش مسأله‌لرینی اوشبو وزیرلیک فعالیتی نینگ اوستوار یونه‌لیشلریدن بیری صفتیده کوریب چیقدی.
شونینگدیک، او پنجشیر نینگ زمرد کانلری و آمو دریا حوزه‌سیده‌گی نفت قازیب آلیش حقیده گپیریب، شونده‌ی دیدی: حاضرگچه پنجشیرده ۴۵۰ کانگه کان قازیب آلیش اوچون جواز بیریلگن و بو ولایت نینگ اون مینگ اهالیسینی ایش بیلن تأمینله‌گن.
شیخ الحدیث شهاب الدین دلاور آمو دریا نفت کانیده ۱۸ ته نفت قودوغی فعالیت کورسه‌ته‌یاتگنی، اولردن هر کونی ۱۱۰۰ تُن نفت قازیب آلینه‌یاتگنی و اون بلاکده ۲۳ کوادرات کیلومتر میدانگه ایگه، هرات نفت کانی شرطنامه توزیلیشینی ایسله‌تیب هم اوتدی.
کان و پترولیم وزیرلیگی نینگ سرپرست وزیری کانچیلیک ساحه‌سیده ایش ا‌ورینلری یره‌تیله‌یاتگنینی ایتیب اوتدی و قوشیمچه قیلدی: ۱۵۰ مینگگه یقین کیشی توغریدن-توغری و بالواسطه تاغ-کان صنعتی نینگ تورلی ساحه‌لریده بند بولیب، کیلگوسیده شرطنامه‌لر توزیلسه، بو رقم ینه‌ده آرته‌دی.
ذبیح الله مجاهد کان و پترولیم وزیرلیگی فعالیتی و یوتوقلرینی یوقاری بهاله‌دی و شونده‌ی دیدی: کان و پترولیم وزیرلیگی مملکت نینگ اقتصادی یوکسه‌لیشی و رواجلنیشیده، اهالی بندلیگینی تأمینلشده مهم و سلماقلی ا‌ورین توته‌‌دیگن اساسی وزیرلیکلردن بیریدیر.
