کابل، ۹ جدی، باختر
حماس نینگ حربی قناتی بولمیش قسام بتلیانلری (گردان) کوچلری اسرائیل اردوسی نینگ ۸ ته زرهلی تانکلرینی یوق قیلگنلیکلرینی معلوم قیلدی.
قسام بتلیانلری اسرائیل اردوسی نینگ اوشبو حربی مو‌ترلری غزه شهریده‌گی التفاح و الدرج حدودلریده همده البریج کمپلری نینگ شرقیده‌گی یاسین ۱۰۵ زرهلی راکت و «شواظ» بومبه‌لری بیلن نشانگه آلینگن و یوق قیلینگنینی دعوا قیلماقده.
شو بیلن بیرگه، اسرائیل غزه اوروشیده بو دولت نینگ ینه ۳ عسکری هلاک بولگنینی اعلان قیلدی، بو عسکرلر حماس – اسرائیل نینگ ۸ ته زرهلی تانکلرینی یوق قیلگنینی دعوا قیلگن کون نینگ اوزیده هلاک بولدی.
اسرائیل – حماس بیلن بیر آی دوام ایتگن اوروشده ۵۰۱ اسرائیللیک عسکر هلاک بولگنینی تن آله‌دی، بیراق اسرائیل مطبوعاتی، نیتانیاهو نینگ تنقیدچیلری و غرب مملکتلریده‌گی مستقل تشکیلاتلر اسرائیل حربيلری قربانلری سانی بو مملکت مدافعه وزیرلیگیدن انچه کوپ ایکنینی ایتیشه‌دی.
حربی قربانلر سانی نینگ آرتیشی نیتانیاهو حکومتیده ایککیلیک بولینیشگه سبب بولدی.
یقینده اسرائیل حماسگه غزه ده اوت آچیشنی توخته‌تیش اوچون ینگی شرطلرنی تکلیف قیلدی، حماس بونی رد ایتدی.
باشقه بیر خبرگه کوره: اسرائیل ریجیم قوشینی نینگ غزه مرکزیده‌گی النصیرات کمپیگه اویوشتیرگن هجومیده بیر ژورنالیست و اونینگ عایله اعضالری شهید بولدی.
جبر ابو هدروس نینگ شهید بولیشی بیلن غزه ده شهید بولگن ژورنالیستلر سانی ۱۰۶ نفرگه ییتدی.
شو بیلن بیرگه، فلسطین ساغلیقنی سقلش وزیرلیگی اسرائیل ریجیمی نینگ هجوملری قربانلری حقیده‌گی سونگگی دولتی معلوماتلریده ۷ اکتوبردن بویان بو هجوملر آرتیدن ۲۱ مینگ و ۵۰۷ کیشی شهید بولگنینی و ۵۵ مینگ و ۹۱۵ کیشینی جراحتلنگنینی اعلان قیلدی.
