کانلر وزیرلیگی: بو وزیرلیک لایحه‌لریده اون مینگلب آدملر ایش بیلن تأمینلنگن
کابل ۲۰ عقرب باختر
کان و پترولیم وزیرلیگی نینگ سرپرستی وزیری، محنت و اجتماعی مسأله‌لر وزیرلیگی نینگ معینی بیلن بولیب اوتگن اوچره‌شوویده تاغ-کان لایحه‌لریده اون مینگلب کیشیلر توغریدن-توغری و بالواسطه ایش ا‌ورینلری یره‌تیلگنینی ایتدی.
کانلر و پترولیم وزیرلیگی خبریگه کوره: بو وزیرلیک نینگ وزیری ملا هدايت‌الله بدری اوز اداره‌سیده محنت و اجتماعی ایشلر وزیرلیگی معینی مولوی محمد زاهد احمدزی بیلن اوچره‌شدی.
اوشبو اوچره‌شووده مملکتیمیز طبيعی و منرال ریسورسلریدن فایده‌لنیشنی ینه‌ده یخشیلش، سرمایه‌دارلرنی جلب ایتیش، تاغ-کان لایحه‌لریده ایش امکانیتلرینی تأمینلش، ایکّی وزیرلیک اورته‌سیده همکارلیکنی ینه‌ده کوچه‌یتیریش بوییچه فکر-ملاحظه‌لر بحث قیلیندی.
بو اوچره‌شووده ملا هدايت‌الله بدری افغانستان منرال ریسورسلرگه بای، بو مملکت ایچکی و خارجی سرمایه‌نی جلب قیلیش، مملکت نینگ اقتصادی اوسیشی و رواجلنیشی، ایش ا‌ورینلری یره‌تیش همده قشّاقلیک و ایشسیزلیکنی برطرف ایتیشده مهم رول اوینا‌شی ممکنلیگینی ایتدی.
شونینگدیک، اونینگ قوشیمچه قیلیشیچه، حاضرده تاغ-کان لایحه‌لریده اون مینگلب کیشیلر توغریدن-توغری و بالواسطه ایش ا‌ورینلری یره‌تیلگن، ایش میدانی رواجلنگن و اوتمیشده‌گیگه نسبتاً کوپراق ایش امکانیتلری یره‌تیلگن. محنت و اجتماعی مسأله‌لر وزیرلیگی نینگ معینی کانلر و پترولیم همده محنت و اجتماعی مسأله‌لر وزیرلیگی اورته‌سیده ایشچی کوچینی ایشگه آلیش ساحه‌سیده کوپراق موافقلشتیریشنی تأمینلشگه علیحده اعتبار قره‌تدی.
