نړۍ، د زمري ۲۲مه، باختر
د اسرایلو صهیونست اشغالګر پوځ خبر ورکړی، چې یو پوځي یې پرون یکشنبې د غزې په سویل کې له فلسطیني مجاهدینو سره په نښته کې وژل شوی دی.
اشغالګر پوځ، چې د خپلو تلفاتو اصلي شمېر نه اعلانوي، د تېرې جولای میاشتې په پای کې ویلي و، چې د غزې په روانه مخامخ جګړه کې یې ۳۲۹ پوځيان وژل شوي دي.
باید وویل شي، چې د تېر کال د اوکتوبر پر اوومه نېټه د حماس غورځنګ په عملیاتو کې ۳۰۰ اسرایلي پوځيان وژل شوي و، چې د روانې جګړې د ټولو وژل شویو شمېر ۶۳۰ تنو ته رسیږي.
خو د ځینو اسرایلي او نورو نړیوالو رسنیو د راپورونو له مخې غزه کې تر دا مهاله زرګونه اسرایلي پوځيان وژل شوي، ټپیان شوي او یا هم سخت معلول شوي دي.
