کوکچې سیند ته غورځېدلی هغه موټر پیدا، خو سپرلۍ یې لا هم ورکې دي

کابل، د لېندۍ ٩مه، باختر
په بدخشان کې د ژغورنې ډلې د پنجشنبې په ورځ د بهارک ـ فیض‌آباد په لاره کې د کوکچې سیند څخه هغه موټر را وایست چې څو ورځې وړاندې په سیند کې ډوب شوی و.
د بدخشان د امنیې قوماندانۍ ویاند احسان الله کامګار ویلي، چې د موټر له ایستلو وروسته په کې د ٥ کسانو هېڅ څرک ونه موندل شو او د دوی د موندلو هڅې لا هم روانې دي.
نوموړي زیاته کړه چې د ژغورنې عملیات د متخصصو ډلو په شتون کې دوام لري او هیله یې څرګنده کړه چې د ورک شویو کسانو درک به وموندل شي.
د یادونې وړ ده چې د دې پېښې کره علت لا نه دی څرګند شوی او څېړنې روانې دي.