د فوربس خپرونه باختر د کب دمياشتې ١٠ :
د دوو خبري منابعو د څرګندونوله مخې، د مالي اقدام ډلې يا (اف اې ټې اف ) د پاکستان په وړاندې د احتمالي تعزيراتو د وضع کولو خبر ورکړى دى.
د فوربس خپرونې په يوه نوي رپوټ کې ليکلي دي چې د مالي اقدام ډلې د اوو صنعتي هېوادونو يا ( جي-٧) پاکستان ته خبردارى ورکړى دى : که په راتلوونکو دريو مياشتوکې ونه شي کړاى د تروريزم په وړاندې لازم اقدامات ترسره کړي؛ د دې احتمال شته چې دغه هېواد د نړيوالې بانکوالۍ په يوه ممنوعه ساحه بدل شي.
د امريکا متحده ايالات، کاناډا، فرانسه، جرمني، ايټاليا، جاپان او بريټانيا د دغه بنسټ غړي دي چې هر کال په بېلابېلو مسئلو له هغه جملې څخه د نړۍ په اقتصاد، نړيوال امنيت او د انرژۍ په پاليسۍ بحث کوي.
د هندايکونوميک ټايمز خپرونې هم دغه شان يو رپوټ خپور کړى دى.
د هندي خپرونو د څرګندونوله مخې: د مالي اقدام ډلې په خپل درې مياشتني خبرداري کې له پاکستان څخه غوښتي دي چې د لازمو اقداماتو په ترسره کولو سره وښيي چې د دعوت الدعوه، جيش محمد او په هغو پورې اړوندو ډلو دتمويلولو لارې يې بندې کړې دي .
د پاکستان د بهرنيو چارو وزارت د دغې موضوع په اړوند د نظر له ورکولو څخه ډډه کړى دى .
د مالي اقدام د ډلې د انترنټي سايټ دمعلوماتوله مخې، تېره اوونۍ د غړو هېوادونو استازوپه بېلابېلو مواردوکې له هغې جملې څخه د فرانسې په پايتخت پاريس کې د تروريزم د تمويلولو په وړاندې د مبارزې په خاطر خبرې وکړې.
دغه راز دوى وويل چې ډاډ ترلاسه شي ترڅو د مالي اقدام د نړيوالې شبکې ټول هېوادونه په بيړې سره د تروريزم د تمويولو د منابعو او ټولړ لارو چارو په باب په موثر ډول اقدامات ترسره کړي.
د مالي اقدام ډلې يا ( اف اې ټې اف) يو بين الحکومتي بنسټ دى چې په ١٩٨٩ کال کې جوړ شوى دى.
د دغه بنسټ اصلي دنده د معيارونو ټاکل او د قانوني، موثرو، نظارتي او عملياتي اقداماتو اجرا کول دي چې د پيسو د مينځلو په وړاندې مبارزه، د تروريستانو مالي تمويل او دغه راز نور خطرونه چې د نړيوال مالي سيستم يو والى له ګواښ سره مخامخ کوي.
دغه نړيوال بنسټ د هند، ترکيې ، چين ، متحده ايالاتو، بريټانيا، فرانسې او جرمني په ګډون ٣٧ غړي لري .
