خبرونهټولنهTOP

کابل ښاروالۍ، د څه باندې ۳۶ زره کیلوګرامه تاریخ تېره او بې ‌کیفیته توکو د لمنځه وړلو خبر ورکړ

کابل، د غويي ۱۲مه، باختر

کابل ښاروالۍ، د څه باندې ۳۶ کیلوګرامه تاریخ تېره او بې ‌کیفیته خوراکي او غیر خوراکي توکو د لمنځه وړلو خبر ورکړی دی.

باختر آژانس ته د یادې ادارې په استول شوې خبرپاڼه کې ویل شوي، چې د کابل ښاروالۍ د چاپېریالي روغتیا او چاپېریال ساتنې ریاست له له لوري، د ښار په کچه له بازارونو څخه د څارنو په بهیر کې؛ ۳۶ زره ۱۵۵ کیلوګرامه تاریخ تېره او بې کیفیته خوراکي او روغتیايي توکي راټول او له ښاره د باندې په ګزک سیمه کې د ټاکل شوي پلاوي په شتون کې لمنځه یوړل شول. 

د کابل ښاروالۍ د مسئولینو په وینا، په یادو موادو کې شیدې، ملايي، بیسکوېټ، غوړي، پنیر، د لوبیا او ماهیانو کنسر، د رومي بانجانو رُب، چپس، پاپړ، شامپو، صابون او نور توکي شامل وو.

د یادې ادارې د مسئولینو د څارنو په بهیر کې، یو شمېر لوډسپیکرونه چې د غږیزې ککړتیا سبب ګرځېدلي وو؛ هم راټول شوي دي.

کابل ښاروالۍ له ښاریانو څخه غوښتنه کړې چې د خپلو اړتیا وړ توکو د پېرودلو پرمهال دې د هغو نېټه او کیفیت په پام کې ونیسي او له پلورونکو څخه یې هم غوښتي چې د بې‌کیفیته توکو له پلورلو څخه دې په کلکه ډډه وکړي.

تر دې وړاندې هم د کابل ښار د بېلابېلو ناحیو له بازارونو څخه زرګونه کيلوګرامه تاريخ تېره او بې ‌کيفيته خوراکي او غیر خوراکي توکي راټول شوي او لمنځه وړل شوي وو.

نور ښکاره کړئ

اړونده مقالې

بیرته پورته تڼۍ ته