کابل، د وږي ٢۹مه، باختر
د کورنیو چارو وزارت سرپرست خلیفه سراج الدین حقاني پکتیا ته د خپل سفر پر مهال ګردیز کې د شاوخوا ۳.۵ میلونه امریکایي ډالرو په لګښت د یوه عیدګاه جومات د جوړولو د بنسټ ډبره کېښوده.
د کورنیو چارو وزارت سرپرست د یاد جومات د بنسټ ایښودلو په مراسمو کې ویلي چې په هېواد کې سرتاسري امنیت ټینګ دی او د رغنیزو پروژو چارې په چټکۍ سره روانې دي.
هغه په دغه مراسمو کې له سوداګرو غوښتي، چې د هېواد د آبادۍ او اقتصادي پیاوړتیا لپاره دې خپله سرمایه د نورو هېوادونو پر ځای په خپل هېواد کې په خوندي توګه مصرف کړي.
دغه جومات، چې په یو وخت د ۱۰ زره لمونځ کوونکو ظرفیت لري لګښت یې د خلیفه سراج الدین حقاني، خیریه بنسټونو او ملي سوداګرو لخوا ورکول کېږي او چارې به یې د ٣ کالونو په موده کې بشپړې شي.
د یادونې وړ ده، چې د اسلامي امارت په واکمنېدو سره په هېواد کې د دا ډول جوماتونو جوړولو ته پاملرنه زیاته شوې ده.
