په نورستان کې د غر ښویېدنې له امله د شهیدانو شمېر ۱۸ ته لوړ شوی
کابل، د کب ۲ مه، باختر
د لغمان د پېښو پر وړاندې د مبارزې او چمتوالي ریاست مسوولین وايي چې د نورستان په نورګرام ولسوالۍ کې د غره ښویېدنې له امله د شهیدانو شمېر۱۸ ته لوړ شوی دی.
د لغمان د پېښو پر وړاندې د مبارزې او چمتوالي رییس قاري خیرمحمد غازي د باخترآژانس خبریال ته وویل:« د خلکو او امنیتي مسوولینو په مرسته تراوسه ۱۸ شهیدان او ۲ ټپیان راویستلي او لا هم ترتیږو لاندې د نورو بند پاتې شویو خلکو د موندلو لپاره هلې ځلې روانې دي».
له بلې خوا د نورستان د نورګرام ولسوال او د سیمې خلک د لغمان والي او ورغلو مسوولینو څخه مننه وکړه چې پروخت یې له دوی سره همکاري او ملتیا کړې.
د یادونې وړده، چې د یاد غره ښويېدنې له امله په یاده سیمه کې د لغمان د فراجغان درې ۳ تنه اوسېدونکي هم شهیدان او یو بل ټپي شوی دی.
