کابل، د لېندۍ ۲۲مه، باختر
د ننګرهار ولایت د بدني روزنې او سپورټ ریاست په همغږۍ او د هېواد د ورزش ادارې د رهبرۍ له لوري د یاد ولایت په خراسان پوهنتون کې د کلنۍ مېلې سپورټي اوونۍ پرانیستل شوه.
په دې سپورټي مېله کې له همڅنګو ولایتونو او ولسوالیو څخه د والیبال، کرکټ، تکواندادو، فوټبال او جمناسټیک بېلابېلو مخکښو لوبډلو او لوبغاړو ګډون کړی، چې نندارې ته یې د ورزش ګڼ مینه وال، مشران او عام وګړي راټول شوي وو.
د المپيک ملي کمېټې او سپورټ عمومي رئيس مولوي احمدالله وثيق د دې برنامې پر پیل خوښي وښوده او په خپلو خبرو کې يې ځوانان سپورټ ته وهڅول او د روغ تن لپاره یې د سپورټ پر پاللو ټینګار وکړ.
نوموړي وویل، چې اوس تر بل هر وخت سپورټ ته ډېره پاملرنه شوې او هڅه کوي څو په ټول هېواد کې د ورزش په بېلابېلو برخو اړین پرمختګونه رامنځته کړي.
د یادونې وړ ده چې د دې برنامې په پای کې په ګرمو غوړیو مخ او لاسونه مینځل، په سر چارمغز ماتول، ښېښې خوړل او نور هېښوونکي نمایشونه هم ترسره شول.
