کابل باختر د وري د مياشتې ٢١ نيټه :
دکتاب ستر دايمي نندارتون پرون د بلخ ولايت په مرکز مزارشريف ښار کې پرانيستل شو.
د باخترآژانس د خبريال د خبرله مخې ؛ د غه نندارتون د شهرکتاب په نامه د اتلس زره عنوانه کتابونو په لرلو سره د پنځه سوه زرو امريکايي ډالرو په لګښت په مزارشريف ښارکې پرانستل شو چې د کتاب لوستونکو او د مطالعې د مينه والو لپاره ټول امکانات پکې په پام کې نيول شوي دي.
د دغه کتابتون مسوول سيد موسى د دغه کتابتون د جوړولو هدف په ټولنې او په تېره بيا د ځوانانو ترمنځ د مطالعې د فرهنګ وده وبلله.
د بلخ ولايت د اطلاعاتو اوفرهنګ ريېس صالح محمد خليق ځوانانو او د کتاب مينه والو ته دکتاب د دغه نندارتون د جوړولو له امله په هرکلي سره وويل: په بلخ ولايت کې د ځوانانو د فکري ودې لپاره څه ناڅه شپېته دولتي او خصوصي کتابتونونه شته .
دغه راز يوشمېر ځوانانو او محصلانو دکتاب د دغه شان سترو نندارتونونو د جوړولو هرکلى وکړ او ويې ويل چې، دغه شان نندارتونونه د مطالعې او د کتاب مينه والو ته فکري او فرهنګي اسانتياوې برابرې کړي دي او د ځوانانو په فکري وده کې مثبته اغيزه لري.
دکتاب دغه نندارتون په داسې حال کې پرانستل کېږي چې په هېواد کې د معلوماتي تکنالوجۍ د سيستم او انترنټ له پراختيا وروسته فرهنګيان دکتاب لوستلو د فرهنګ د پيکه کېدو له امله اندېښنه څرګندوي. پاى ج ذ
