خبرونهټولنهTOPښوونه او روزنه

په لوګر کې شاوخوا ۱۷۰۰ تنوترمنځ د سیرت النبي(ص) سیالي پرلاره واچول شوه

کابل، د سلواغې ۲۷مه، باختر
د لوګر د اطلاعاتو او کلتور ریاست او د ارواښاد حاجي منګل احمدزي علمي او ښوونیز مرکز په ګډه همکارۍ د ولایت په کچه شاوخوا ۱۷۰۰ تنه زده کوونکو، د دیني مدرسو طالب العلمانو، زده کړیالانو او ځوانانو ترمنځ د سیرت النبي (ص) سیالي پرلاره واچول شوه
د دغه ولایت د اطلاعاتو او کلتور رییس رفیع الله صمیم باختر آژانس ته وویل دغه سیالي چې د دیني او عصري علومو په برخو کې د ځوانانو او زده کوونکو د مالوماتو زیاتوالي، مطالعې دود غښتلي کول او د ځوان نسل فکري رغښت یې اصلي موخې دي، په پوره شفافیت سره پرلاره واچول شوه، چې په کې د دې ولایت د مرکز په ګډون د ولسوالیو څخه شاوخوا ۱۷۰۰ تنه ځوانانو او زده کوونکو ګډون کړی دی.
دغه ډول د پکتیا ولایت مرستیال والي مولوي انعام الله صلاح الدین د ځوان نسل لپاره د عملي پروګرامونو برخه کې د لوګر د اطلاعاتو او کلتور ریاست هڅې او زحمتونه د ستاینې وړ وبلل او له ځوانانو یې غوښتنه وکړه، چې دا ډول علمي سیالیو کې ګډون ته دوام ورکړي.
همداراز د لوګر د علماو د شورا مرستیال مولوي خان محمد منصور وویل؛ ډېر د خوشحالۍ ځای دی، چې نن په ډېر شمېر ځوانانو د یو بل سره د سیرت د مطالعې او زده کړې په برخه کې له یو بل سره سیالي کوي، نوموړي د اطلاعاتو او کلتور ریاست پر مسؤلینو غږ وکړ، چې دا ډول برنامې دې دوامداره وساتي.
ورته مهال محمد خالد، محمد میرویس او مصباح الله، د یادې سیالي درې تنه ګډونوالو د ځوانانو لپاره د علمي او فکري پروګرامونو برخه کې د اطلاعاتو او کلتور ریاست د مسوولینو له هڅو مننه وکړه، چې داسې یو ستره سیالۍ یې ورته پرلاره اچولې ده.
د یادونې وړ ده، چې د دغه سیالۍ پنځوس تنه بریالي او مخکښو ګډونوالو لپاره د کمپیوټر ترڅنګ، قلمي قرآن شریفونه، مبایلونه، کتابونه او د لومړی مقام ګټونکي ته عمرې حج ته تګ په نظر کې نیول شوي دي.
دا په داسې حال کې ده، چې په شاوخوا تېرو دوو کلونو کې د اطلاعاتو او کلتور ریاست لخوا د لوګر په مرکز او ټولو ولسوالیو کې د سیرت النبي(ص) فکري روزنې، فکري جګړې او نورو برخو کې زرګونو تنوځوانانو، زده کوونکو او زده کړیالانو لپاره ۱۶ نورې علمي سیالۍ هم پر لاره اچول شوې دي.

نور ښکاره کړئ

اړونده مقالې

بیرته پورته تڼۍ ته