په لغمان کې د ولسونو د يو والي او له امنيتي ځواکونو څخه دکلک ملاتړ غونډه جوړه شوه.

 کابل باختر دتلې دمياشتې ٢٣ :
د لغمان ولايت د مرکز او ولسواليو په لسګونو ديني عالمانو ، قومي مشرانو،
جهادي شخصيتونو،د مدني ټولنو غړو  او ځوانانو د يو والي او دا منيت په تامينولو کې له  امنيتي ځواکونو څخه د کلک ملاتړ غونډه جوړه شوه.
په دې غونډه کې د افغانستان داسلامي جمهوري دولت د قومونو او قبايلوچارو وزير ګلاب منګل، دلغمان والي عبدالجبارنعيمي، د قومونو او قبايلو  په چارو کې د وجمهوررييس سلاکار وزير عبدالهادي واحدي،د ولايتي شورا غړو ،د امنيتي ارګانونو مسوولينو، منسوبينو او د دولتي ادارو  رئيسانو هم برخه درلوده.
په غونډه کې د لغمان ولايت د ولايتي شورا غړو ، د مرکز مهترلام، الينګار، قرغه يي، اليشنګ او دولت شاه ولسواليو ديني عالمانو او مشرانو د خپلو خبرو پرمهال د هېواد د دښمنانو ټولې ناروا تروريستي کړنې په کلکه وغندلې او د دښمنانو ټولې کړنې يې د اسلاميت او بشريت پرخلاف وبللې .
د لغمان ولايت ديني عالمانو او مشرانو حکومت ته ډاډ ورکړ چې په  يو والي سره به دخپل نظام تر چترلاندې د امنيتي ځواکونو ملاتړ کوي د سر او  وينو په قيمت سره به خپله خاوره ساتي.
دوى د ولس او نظام پر دښمنانو غږ وکړ چې خپلې باطلې جګړې ته د پاى ټکى کيږدي او نور د پرديو په اشاره په دې خاوره کې د ظلم، وحشت او دهشت لوبې پاى ته ورسوي.
د لغمان ولايت ديني عالمانو او  ولسي مشرانو سوله يو  الهي امر  ياد کړ او له دې امر څخه يې سرغړونکي  د اسلام او افغانانو دښمنان وبلل  او دا خبردارى يې هم ورکړ که له دې وروسته هرڅوک په لغمان ولايت کې د امن، سولې او ثبات پرضد حرکت وکړي په ولسي قوت به  يې مخنيوى وکړي.
عالمانو ټول هغه کسان شهيدان وبلل چې د امنيتي، کشفي او نظامي ارګانونو په ليکو کې د دې خاورې له ارضي تماميت، دولتي حاکميت، ملي ګټو او ملي نواميسو څخه د سر او وينو په  قيمت سره د فاع کوي او هغه يې د دې ټولنې او تاريخ شرميدلې کسان وبلل چې د نورو په اشاره خپل هېواد  ورانوي.
د لغمان ولايت د امنيتي ارګانونو په استازيتوب د لومړۍ پلې لوا  قوماندان خبرې وکړې، د ولسونو له ملاتړ څخه مننه وکړه او د خوښۍ  په څرګندولو سره يې دوی ته ډاډ ورکړ چې د دې وطن د ټولو سيمو ، هسکو مينو او  درو  امنيت به وساتي ترڅو چې يو سرباز  هم ژوندى هم وي د خپل ولس او خاورې  څخه به دفاع وکړي او  په خلکو  يې غږ  وکړ چې د امنيت په تامينولو  کې  له دوى سره همکاري وکړي .
د افغانستان اسلامي جمهوري دولت د قومونو او قبايلو چارو وزير محمد ګلاب  منګل د خلکو يو والى د هېواد په پرمختګ او امنيت کې ډير مهم وباله  او له امنيتي،کشفي او پوځي ځواکونو څخه په ټينګه ولسي ملاتړ يې د ولس اسلامي او ملي مسووليت ياد کړ. 
ده پر خلکو غږ وکړ چې سره يو شي او په خپل هېواد کې د روانو بدمرغيو او نا امنيو په مخنيوي کې له دولت سره اساسي همکاري وکړي.
ښاغلي منګل ډاډ ورکــړ چې د لغمان ولايت د خلکو  ټولې غوښتنې  به      تر عالي مقام پورې  ورسوي.
د لغمان والي عبدالجبار نعيمي  غونډې ته د خپلو خبرو پرمهال د امنيتي ځواکونو  کړنې،لاسته راوړنې او قربانۍ وستايلې او د دوى قربانۍ  يې د وطن په دفاع او ساتنه کې نه هيريدونکې وبللې. 
ده  هغه کسان د اسلاميت او بشريت دښمنان وبلل چې د پرديو په اشاره په دې خاوره کې د جومات ، ښوونځي ،کلينيک،سړک، پل ، علم او قلم پرضد جګړه کوي او ټوله ورځ د پرديو په پيسو او ټوپکونو خپل هېواد  ورانوي.
ده زياته کړه: که ولسونه د خپل نظام تر چتر لاندې خپل اتحاد وساتي نو د هغه  دښمن خوله به له تورو خاورو ډکه او افغانستان به له روانو بدمرغيو وژغورل شي.
ده له هغه پلار ، مور او کورنۍ څخه درناوى وکړ  چې او لادونه يې د دې خاورې او ولس  دخدمت په لاره کې شهيدان شوي دي او د هغه کورنيو پر حالت او ژوند يې افسوس څرګند کړ چې اولادونه يې د هېواد په ورانويو کې وژل کيږي.
د غونډې په پاى کې د لغمان ولايت ټولو مشرانو او ديني عالمانو  دولت ته  د امنيت په تامين کې دهر اړخيزې همکارۍ ډاډ ورکړ او په دې برخه کې يې شپه او ورځ خپل چمتوالى وښود
وروسته د امنيتي،کشفي او  پوځي ارګانونو  يو شمير منسوبينو  ته چې  دخاورې او ولس دخدمت په ډګر کې يې ښې لاسته راوړنې درلودې مکافات او ستاين ليکونه ورته ورکړل شول.