کابل / د چنګاښ ۲۵مه / باختر
په ژورې خواشينۍ سره مو خبر ترلاسه کړ چې د رويټرز خبري آژانس هندي توکمی خبريال او عکاس دانش صديقي نن سهار د قندهار په سپين بولدک ولسوالۍ کې د رپوټ د برابرولو په بهير کې وژل شوى دى. دغه ناوړه خبر زموږ د ژورې خواشينۍ سبب شوى دى. موږ دغه کار چې د دولت مخالفين د خبريالانو خونديتوب ته هم ارزښت نه ورکوي؛ زيات اندېښمن کړي يو.
موږ په داسې حال کې چې د رويټرز خبري آژانس د هندي توکمي خبريال او عکاس دانش صديقي وژل په کلکه غندو، د دولت له وسله والو مخالفينو څخه چې زياتره د خبريالانو د وژلو سبب کېږي؛ غوښتنه کوو چې پرېږدي خبريالان په اطلاع رسونه کې د خلکو پر وړاندې خپل مسووليتونه ترسره کړي.
د اطلاعاتو او فرهنګ وزارت رهبري په قندهار کې د جګړو له بهير څخه د اطلاع رسونې په وخت کې د دغه خبريال وژل د اندېښنې وړ بولي او هغه ته د فردوس جنت او د هغه کورنۍ او د رويټرز خبري آژانس کارکوونکو او د خبريالانو ټولنې ته د صبر او زغم هيله کوي.
ج-ا
