کابل، د مرغومې ۷مه، باختر
د افغانستان کرکټ بورډ انجنیرۍ څانګې په خوست ولایت کې د رحمت ولي مسرور کرکټ لوبغالي اړوند سر لوڅې کرکټ اکاډمي د رغونې چارې بشپړې او نن رسماً د یو لړ مراسمو په ترڅ کې ګټې اخیستنې ته وسپارل شوه.
په دغه پروژه کې د اکاډمۍ هوارول، د چمن کرل او ۸ ویشتنځایونه چې په کې ۴ د چپسو او ۴ خاورین ویشتنځایونه شامل دي ګټې اخیستنې ته وسپارل شوه.
د یادونې وړ ده چې د افغانستان کرکټ بورډ د اجرایوي رییس نصیب خان په سپارښتنه په یاد لوبغالي کې د لوبغاړو د اوسېدنې لپاره د یو معیاري مېلمستون رغنیزې چارې هم پیل شوې چې تر دې مهاله ۵۰ سلنه بشپړې شوې او پاتې نورې به یې هم په نږدې راتلونکې کې بشپړې شي.
