په ارزګان کې په دوو جلا جلا چاودنو کې څوارلسو تنو ملکي وګړو ته مرګ ژوبله واوښته
کابل باختر دتلي نولسمه :
په ارزګان ولايت کې ددوو پرله پسې چاودنو له امله څوارلسو تنو ملکي وګړو ته مرګ ژوبله واوښته .
دغه پيښه پرون دارزګان ولايت د چوري ولسوالۍ د انعام په کلي کې هغه وخت رامنځته شوه چې دملکي وګړو دسپرلۍ کاروان په سړک کې په دوو ښخ کړي شويو ماينونو وخوت .
دارزګان دوالي ويندوى دوست محمد ناياب دباختراژانس خبريال ته وويل چې په دغو چاودنو کې درې تنه ملکي وګړي شهيدان او يوولس تنه نور ټپيان شول .
درارسيدلو خبرونو له مخې ، دغه ملکي وګړي دڅو کورنيو غړي و چې دتفريح لپاره يوه تفريح ځاى ته روان و .
دارزګان دوالي وياند وسله وال طالبان ددغه بمي بريد مسوول وبلل.
ده وويل چې ددغې پيښې دعاملينو دپيژندنې اونيولو لپاره هلې ځلې پيل شوي دي .
په همدې حال کې دارزګان ولايت په يوه روغتيايي مرکز کې ډاکترانو ددغې پيښې دڅه ناڅه پنځو تنو ټپيانو روغتيايي حالت خراب وباله .
په افغانستان کې وسله وال طالبان زياتره په ګڼ ميشتو سيمو او لارو کې دبمونو او ماينونو په ښخولو لاس پورې کوي هغه اقدام چې زياتره ملکي وګړي پکې قرباني کيږي .
