نړیوال بانک په کابل کې خپل دفتر پرانیزي
کابل، د لېندۍ ۱۵مه، باختر
د مالیې وزارت ویاند احمد ولي حقمل وايي چې نړیوال بانک له دغه وزارت سره د دوامداره تعامل په ترڅ کې ژمنه کړې چې په کابل کې به خپل دفتر پرانیزي.
حقمل په یوه ویډیویي پيغام کې ویلي چې دغه بانک ژمنه کړې چې د راتلونکي ۲۰۲۴ ز کال کې په جنوري میاشت کې به په کابل کې خپل دفتر په رسمي ډول پرانیزي.
نوموړي زیاته کړې یاد بانک همدرانګه ویلي چې د ۲۰۲۴ کال تر اپرېل میاشتې پورې به د دغه بانک په مالي ملاتړ د پلې کېدونکو پروژو لګښتونه چې کارونه یې ترسره شوي ورکړي.
هغه ویلي دغه وزارت هڅه کوي چې د دغو پروژو د لګښتونو له اجرا وروسته یاد بانک دې ته وهڅوي چې د هغو پروژو پاتې کارونه هم بشپړ کړي.
