کابل، د زمري ۲۰مه، باختر
د اطلاعاتو او کلتور وزارت سرپرست ملا خیرالله خیرخواه، نن د «آنلاين» ناستې له لارې د ولایتونو د اطلاعاتو او کلتور رئیسانو ته د اسد ۲۴مې لپاره د تیاریو او ځانګړو پروګرامونو د جوړولو په موخه لازمې سپارښتنې کړې دي.
باختر آژانس ته په رارسېدلې خبرپاڼه کې ويل شوي چې، په ياده ناسته کې چې د ملي ټلویزیون له لارې د اطلاعاتو او کلتور وزارت د سرپرست په مشرۍ ترسره شوه؛ د زمري ۲۴مې د لا ښې نمانځنې په موخه د ناستو او خلکو د تنظیم په تړاو د هېواد د ټولو ولایتونو د اطلاعاتو او کلتور رئیسانو او اړوندو مسئولینو ته په سپارښتونو کې پر بشپړ چمتووالي ټینګار وشو.
ملا خیرخواه په خپلو خبرو کې ويلي دي: “د دغه عظیم استقلال او فتحې نمانځل د افغانستان د مجاهد ملت غوښتنه ده؛ کوم چې د شهیدانو او دردېدلي ولس آرمان او د سلګونو زرو شهیدانو د قربانیو نتیجه ده؛ نو دا زموږ مسؤلیت دی چې د سکون او امنیت ډکه فضا رامنځته کړو؛ څو ملت په ډاډمنه فضا کې د خپلواکۍ جشن ونمانځي.”
هېره دې نه وي چې درې کاله وړاندې د اسد/زمري په ۲۴مه د افغان متدين او مجاهد ملت د ډېرو قربانيو او د زرګونو شهيدانو د پاکو وينو په پايله کې، د امريکا په مشرۍ اشغالګر له شرموونکې ماتې سره مخ شول؛ افغانستان بشپړه خپلواکي ترلاسه کړه او اسلامي نظام په کې واکمن شو.
